Pierre Henry (Komponist)

Us der alemannische Wikipedia, der freie Dialäkt-Enzyklopedy
(Witergleitet vun Pierre Henry)
Dä Artikel bezieht sich uf e Komponischt Pierre Henry. Witeri Lüüt mit däm Naame findsch do.
dr Pierre Henry (2008).

Dr Pierre Henry (* 9. Dezämber 1927 z Paris; † 5. Juli 2017 ebe dert) isch e zytgnessische franzesische Kumbenischt gsii. Är giltet as ain vu dr frieje Verdrätter vu dr elektronische Musik un dr Musique concrète.

Lääbe[ändere | Quälltäxt bearbeite]

Dr Henry het scho as e Chind, vu 1937 bis 1947, am Pariser Konservatorium studiert, unter anderem bi dr Nadia Boulanger, em Felix Passerone un em Olivier Messiaen.

Zwische 1949 un 1958 het dr Henry am Club d’Essai-Studio vum RTF gwirkt, wu vum Pierre Schaeffer grindet woren isch. In dr Johr 1949 bis 1950 het dr Henry zäme mit em Schaeffer d Symphonie pour un homme seul kumbeniert. D Uruffierig isch am 18. Merz 1950 gsii un het fir Ufsää gsorgt, wel dr Henry zäme mit em Schaeffer un em Jacques Poulin in dr Pariser École Normale de Musique de Paris e Wäärch ohni Partitur vorgstellt het, wu elektronisch mit Hilf vu Schallblatten iberdrait woren un nume us Klangcollagen bstanden isch. Dää Dag giltete as Geburtsstund vu dr Musique concrète.

Anne 1958 het dr Henry s RTF verloo un het 1960 zäme mit em Jean Baronnet s erscht privat elektronisch Studio vu Frankrych grindet.

Dr Henry het syter anne 1952 näbe Ballett- au Filmmusik kumbeniert. Är het unter anderem mit dr Choreografe Maurice Béjart un Alwin Nikolais zäme gschafft. Sy erfolgrychscht Wäärch isch d Messe pour le temps présent us em Johr 1967 gsii. Mit Psyché Rock us däre Mäss het er si zum erschte Mol au dr Rockmusik zuegwändet, des Lied isch speter zum Titellied vu dr Serie „Futurama“ iberschafft. In Ceremony vu anne 1969 het er mit dr Gruppe Spooky Tooth zäme gschafft.

Dr Pierre Henry het nit Yyfluss nume di Nei Musik in dr zwoote Helfti vum 20. Johrhundert ghaa, är giltete näb em Karlheinz Stockhausen au as ain vu dr „Väter“ vum Techno.

Fir d 2006 nei yygriichtet Stroßebahn z Milhüüse het dr Henry individuälli Erkännigsmelodie fir d Stationsaasage gschaffe.

Uusgläseni Wäärch[ändere | Quälltäxt bearbeite]

  • 1950 Symphonie pour un homme seul (zäme mit em Pierre Schaeffer)
  • 1951 Le microphone bien temperé
    Musique sans titre
    Concerto des ambiguities mit Klavier
  • 1952 Erschti Filmmusik in musique concrete fir dr Film Astrologie vum Jean Grémillon
  • 1953 Orphée 53, Experimentalopere fir d Eschinger Musikdäg, s erscht Bihnestuck in musique concrète (zäme mit em Pierre Schaeffer)
  • 1955 Arcane (Ballett)
  • 1956 Haut voltage (Ballett)
  • 1959 Coexistence
    Investigations
  • 1960 La noir a soixante
  • 1962 Le voyage (Ballett)
  • 1963 La Reine Verte (Ballett)
  • 1967 Messe pour le temps présent (zäme mit em Michel Colombier)
  • 1968 L’apocalypse de Jean
  • 1969 Ceremony zäme mit dr Rockband Spooky Tooth
  • 1971 Nijinsky, clown de dieu (Ballett fir dr Vaslav Nijinsky|)
  • 1973 Kyldex I (kybernetischs Ballett)
  • 1975 Futuriste, Maanig an dr italienische Futurischt Luigi Russolo
  • 1979 La Dixième Symphonie, Hommage an dr Ludwig van Beethoven
  • 1986 La Dixième Symphonie De Beethoven
  • 1990 Le livre des morts égyptien
  • 1997 Interieur/Exterrieur

Weblink[ändere | Quälltäxt bearbeite]


Dä Artikel basiert uff ere fräie Übersetzig vu dere Version vum Artikel „Pierre_Henry“ vu de dütsche Wikipedia. E Liste vu de Autore un Versione isch do z finde.