Orisbach

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Orisbach isch es Gwässer im Baselbiet.

Dr Bach isch nüün Kilometer lang. Er flüsst dur nes Tal – s Oristal – im Tafeljura und mündet bi Lieschtel id Ergolz.

Dr eint Quellbach chunt vom soledurnische Doorff Büüre und der ander, wo Rueschtelbach heisst, us sym Tal, eben em Rueschtel, wo au uf Büüremer Boden isch. Undem am Doorff Büüre münde die beede Bech uf der Fluer Langeschtrich inenand, und das git de dr Orisbach.

S schmalen Oristal zdurabb lauft dr Orisbach föif Kilometer gäge Nordoschte bis uf Lieschtel. Linggs vonnem liggen uf iirne Gländterrasse d Döörffer Bantlion und Nuugle, wo zum soledurnische Scharzbuebeland ghööre, und uf dr rächts Syte d Baselbieter Ortschafte Lupsigen und Sältisbäärg. D Kantonsgränze goot em Orisbach noo. Underem Luusebäärg isch die alti Orismüli.

Bim Wyler Nöi-Nuugle lauft d Gränze vom Bach furt gäge Nordweschte zu der Sichteren ufe. Der Orisbach chunt jetz in Gmeindbann vo Lieschtel. Drüü Kilometer het er no vor sich bis zu dr Ergolz abe. Doo chunt dr Bach an es paar inträssante Sache verby: dr Fischzucht bim Orishof, em vilfältige Gwäärbgebiet im vorderen Oristal, de Woonquartier Oristal und Schwieri, wo s alte Schwieribechli us em Bach furtlauft, und er gumpet über en Wasserfall abe; dört, wo dr Bach jetz under em breite Bahndamm mit dr SBB-Linie vo Basel uff Luzärn und mit em Gleis vom Waldeburgerli undeduregoot, isch früener der ober Stadtweiher vo Lieschtel, dr Orissee gsi.

S Tal vom Orisbach isch im Mittelalter so öppis wie der weschtlich Stadtgrabe vo dr alte Stadt Lieschtel gsi, und vom undere Tor isch e Brugg drüber. Unden am alte Stadtzäntrum chunt der Bach no zmitzt dur nes anders stedtischs Gwäärbgebiet, und de isch er bi dr Ergolz.