d’ Muller-Àffara

Dialäkt: Mìlhüüserdiitsch

D’ Muller-Àffara-n-ìsch a elsassischer Rachtshàndel gsìì, wu dr Àrzt Jean-Louis Muller vum Mord vu siinera Ehafràui Brigitte Muller ààklàgt worra-n-ìsch. D’ Brigitte Muller ìsch àm 8. Nowamber 1999 ìn ìhrem Wohnsìtz z’ Ìngwiller ìm Unterelsàss toot uffgfunda worra. Dr Jean-Louis Muller ìsch z’äärscht ànna 2008 un 2010 waga Mord züa 20 Joohra Zuchthüüs verurtailt worra, àwwer ìsch ànna 2013 fräigschproocha worra. Woohrschiinsig hàt sìch d’ Brigitte Muller s’ Laawa gnumma. Vu dr Àffara hàt ma-n-ìm gànz Frànkriich grädd.

Laawesbschriiwunga

D’ Brigitte Muller (geborena Oudille) hàt hàlbtààgs àls Dokümantasàmmlera àn dr Üniwärsiteet vu Schtroossburi gschàfft. Sa hàt a Lizanz vum Itàlianischa bschtànda ghàà un ìsch um Kunscht un Lìteràtüür ìnträssiart gsìì. Sa hàt zwai Briader ghàà. Maa hàt gsajt, àss sa liablig, ämpfìndlig un z’ruckhàltend gsìì-n-ìsch.

Dr Jean-Louis Muller hàt dräi Schwäschter. Sii Vàtter ìsch aigawìllig gsìì; ar ìsch Àrzt un Unteroffiziar ìn dr Wehrmàcht gsìì, àls mosellànischer Zwàngsiigezoganer. D’ Müatter ìsch sehr schtrang gsìì. Dr Jean-Louis Muller hàt Militäär wälla wara, àwwer sii Vàtter hàt bschlossa, àss’r Àrzt müass wara. Sii Hüüs hàt dr Jean-Louis uff’m Aigatumm vu siim Vàtter loo bàuia — dàs hàt àui dr Vàtter wälla. Wu dr Vàtter àls Àrzt ìn Rüahjschtànd gànga-n-ìsch, hàt’r ìm Suhn siina Pàzianta ìwwerloo. Dr Jean-Louis hàt ìhm àls Geegalaischtung nìcks gaa, àlso hàt’na dr Vàtter mìt’ra Flìnta droht.

Dr Jean-Louis ìsch fräiwìlliger Pumpie gsìì. Àls Hüüsdokter hàt’r a güater Rüaf ghàà. Ar ìsch àui Grìchtsmediziner, Owerschtlöitnànt ìn dr frànzeescha Resarwa un Lehrbeufftràgter àn dr Üniwärsiteet gsìì. Drzüa ìsch’r Mìtglìed ìm Gmaindaroot un ìm Vogeesaklubb gsìì. D’ Nochber hann’na àls a garzorniger Mäckerer, a unsättliger Schwatzer un a Morààlpreediger bschrììwa. D’haim hàt’r sììwana Wàffa ghàà; àlla sìnn ààgmäldet gsìì. Mìt dana Wàffa hàt’r uff a reegelmaasiga-n-Àrt ìm Schìtzaverain vun Ìngwiller träniart. Ìn dr Vergàngahait ìsch dr Jean-Louis Muller schuu gwàlttaatig gsìì: Wu-n-’r a Schtrittsàch mìt siinera Tailhàwerin ìm Àrztpràxis ghàà hàt, hàt’r sìe mìt’ra Wàffa gedroht.

Ìn ìhra Kìnderjoohra sìnn dr Jean-Louis un d’ Brigitte Muller zamma ìn d’ Schüal gànga. Ànna 1984 hann sa ghiiroota un hann sìch z’ Ìngwiller nììdergloo. D’haim hàt s’ Pààr mehrera Rässer ghàà. Ìm Janner 1998 ìsch d’ Brigitte vu’ma Ross àm Gsìcht gschlààga worra; sa ìsch schwar verlätzt worra un hàt zwaimol müassa operiart wara. Dr Jean-Louis hàt ìhr a Narvahailmìttel verschrììwa, dänn d’ Brigitte säjg noh-n-em Unfàll deprässiv worra. D’ Brigitte ìsch zwàr mehrmols ze’ma Psyschiàter gànga, dänn sa hàt bschteh Àngscht ghàà, àwwer dr Àrzt hàt kää Deprässioon fäschtgschtällt. Ar hàt sogàr ìn dr Brigitte ämpfoohla, weniga Narvahailmìttel iiz’namma.

Ìm Oktoower 1999 hàt d’ Brigitte dr Hans-Peter kännaglehrt, a Füüsiker un Forscher biim CNRS z’ Schtroossburi. ’S ìsch vor àllem a plàtonischa Liawesbeziihung gsìì, àwwer sa hann sìch àm 5. Nowamber 1999 uff’ma Bànk àm Kleber-Plàtz a Schmutz gaa. Ìnsgsàmt hann sa sìch viarmol gtroffa.

Ìn dr Brigitte ìsch d’ Neecha vum Jean-Louis siim Vàtter schwar ärtraaglig gsìì. D’ Äältra vum Jean-Louis hann d’ Brigitte nìt känna liida. Vorhar hàt schuu d’ Brigitte ìn ìhra Frììnda un Fàmìlia gsajt ghàà, àss sa sìch vum Jean-Louis wìll loo schaida. Sa hàt ìm Jean-Louis vorgworfa, àss’r sìe nìt unterschtìtzt hàt noh-n-em Unfàll mìt’m Ross.

àm Oowa vum Tood

Àm Oowa vum 8. Nowamber 1999 hann d’ Brigitte un dr Jean-Louis Muller a bìttera Dischkussioon um ìhr Ehalaawa ghàà — villiicht hàt d’ Brigitte wälla, ìm Ehamànn ìhra Beziihung mìt’m Hans-Peter verkìnda. Noh-n-em Assa-n-ìsch d’ Brigitte ìn dr Kaller gànga, wahrend àss dr Jean-Louis ìsch a Fìlm gànga ge lüaga.

Àm 21 Ühr 24, hàt dr Jean-Louis Muller d’haim z’ Ìngwiller d’ Schàndàrmerii vu Zàwra-n-ààgrüafa. Ar hàt gsajt, àss’r a Fìlm hàt düa lüaga, wu-n-’r a groosser Kràch ìm Kaller gheert hàt. Ar säjg ààwa gànga un hatt doo siina Fràui Brigitte toot uffgfunda, ìm Schpììlzìmmer vu da Kìnder. D’ Schàndàrma sìnn kumma un hann d’ Laicha äntdäckt, mìt Blüat drumm umma àm Booda un àm Plafoo. Grààd bii dr Laicha ìsch a .357 Magnum voll blüat gsìì. D’ Schàndàrma hann kää Füassdàppa gsah. Vor’ma Bìld vu dr Hoochzitt vum Pààr hann sa àwwer a Schokolààdapàpiir gfunda, wu „Ciao, ciao, ciao“ gschrììwa gsìì-n-ìsch. Dr Pàpiir ìsch mìt’ma Masser uff a Schnaidbratt gschtoossa gsìì. D’ Laicha-n-ìsch nìt verschììwa worra, un ’s sìnn kää Putzaschpüüra gsìì — ’s ìsch àlso vermüatlig kää Iizäniarung gsìì.

d’ Ärmìttlung

D’ Obdütàzioon hàt zaigt, àss d’ Brigitte nìt gschlààga worra-n-ìsch. Ìn dr Brigitte ìhra Hìrnmàssa hàt verplàtzt ghàà. Maa hàt àui a Schussschtudia gmàcht, un àm 21. Hornung 2000 hàt maa offiziäll gsajt, àss d’ Brigitte Muller sìch s’ Laawa gnumma hàt. D’ Ärmìttlung ìsch àlso iigschtällt worra, un àm 13. Nowamber 1999 hàt maa d’ Laicha verbrännt.

Mìt dr Iischtällung vu dr Ärmìttlung ìsch àwwer d’ Fàmìlia vu dr Brigitte nìt z’frììda gsìì. Àm 19. Oktoower 2000 hàt àlso d’ Schtààtsànwàltschàft a näi Ärmìttlungsverfàhra iiglaita, fìr d’ Toodesbedìgunga untersüacha. Naamlig hàt a Psyschiàter gsajt, àss d’ Muller nìt deprässiv gsìì-n-ìsch. Ar hàt àwwer gsajt, àss ìm Pààr kää Gwàlt gsìì-n-ìsch.

Uff dr Wàffa-n-ìsch kää Fìngeràbdruck gsìì. A Untersüachung vum diitscha Bundeskriminàlàmt hàt zaigt, àss a bediitenda Mänga Schusspulwer uff da Hand un da Ärmel vum Jean-Louis Muller gsìì-n-ìsch. Uff da Hand un Ärmel vu dr Brigitte ìsch fàscht kää Pulwer gsìì, àwwer uff ìhra lànga Hoosa-n-ìsch vììl Pulwer gsìì. Wu maa d’ Wàffa uffgfunda hàt, sìnn ìm Màgazin 5 Kugla gsìì; 3 drvu sìnn schuu gschoossa worra gsìì. Uff dr Wàffa-n-ìsch àui a klaina orgànischa Schpüür vu dr Brigitte gsìì.

Schpeeter hàt maa-n-a Untersüachung fìr Tootschlààg iiglaita. Àm 6. Nowamber 2001 ìsch dr Jean-Louis Muller d'haim z’ Ìngwiller verhàfta worra. Zwai Taaga làng ìsch’r z’ Metz ìn Polizäigwàhrsàmkait gsìì. Drnooh ìsch’r vum Mord vu dr Brigitte Muller ààklàgt worra; ar ìsch àlso iigschpärrt worra. D’ frànzeescha Ärmìttler hann dr diitscha Grìchtmediziner Christian Schyma um Hìlf gfrooga. Fìr d’ Verplàtzung vun dr Brigitte siinera Hìrnmàssa-n-ärkläära, hàt dr Schyma a näija Àànàmma vorgschlààga: dr Märder hatt mìt’m .357 Magnum a äärschter Schuss vun ain odd’r zwai Määter aawag gschossa, un drnooh a zwaiter Schuss üss àllernachschter Neecha mìt’ra Flìnta mìt Plàtzpàtroon, fìr a Salbschtmord iizäniara.

d’ Prozassa

Àm 4. Oktower 2008 hàt dr äärscht Prozass vum Jean-Louis Muller ìm Unterelsassischa Schwurgrìcht z’ Schtroossburi ààgfànga. Vertaidigt worra-n-ìsch dr Muller dur d’ Ànwàlt Thierry Moser, François Saint-Pierre un Pierre Schultz. Dr Marc Vialle un dr Michaël Wacquez sìnn d’ Ànwàlt vun dr Brigitte ìhrer Fàmìlia gsìì. Ìm Prozass hàt dr Dokter Schyma gsajt, àss ìn dr Brigitte ìhra Hìrnmassa hàt känna verplàtza, àui wänn ’s numma-n-a Schuss mìt’m .357 Magnum gsìì. Ar hàt ärkläärt, àss dàs ìsch schun amol asoo ìn dr Vergàngahait gsìì — ar hàt doo drìwwer a wìssaschàftliger Àrtìckel gfunda. Dr Hans-Peter hàt jedoch behàuipta, àss d’ Brigitte kää Salbschtmordàbsìchta ghàà hàt, dänn sa hàt noh dr Unfàll wììder ìns Laawa z’ruckgfunda. Àm And vum Prozass hann d’ Gschwoorena ààgnumma, àss dr Muller siina Fràui ärmordert hàt; ar hatt sìch drnooh gdüscht, hatt Plunder gwackselt, d’ Wàffa geputzt un hàt d’ Schàndàrma-n-ààgrüafa. Noh viar Schtunda Berootung ìsch dr Jean-Louis Muller züa 20 Joohra Zuchthüüs verurtailt worra. Ar ìsch ìn Àppall gànga.

Vor’m Berüafungsprozass hàt dr Muller salbscht d’haim a Wììderzammasätzung orgànisiart, wu-n-ìhra Schwäschter so wia dr Dr. Patrice Mangin vu dr Üniwärsiteet vu Gämf mìtgmàcht hann. Doo hàt dr Muller mehrera Àànàhma prowiart. Dr Mangin hàt kää Schlìssa gzooga; ar hàt àwwer gschrììwa, àss dr Mord vu dr Brigitte Muller fàscht unmeeglig gsìì-n-ìsch, un àss d’ Brigitte woohrschiinsig Salbschtmord üssiawt hàt. Saller Brìcht hàt jedoch kää rachtliga Bediitung.

Àm 14. Jüüni 2010 hàt dr Berüafungsprozass vum Jean-Louis Muller àm Owerelsassischa Schwurgrìcht z’ Kolmer ààgfànga. Trotz’m Brìcht vum Dr. Mangin hàt sìch nochamol dr Hoof verwaigert, a Wììderzammasätzung z’ orgànisiara. Àlso ìsch dr Muller schtìll blììwa. Dr Jean-Louis Muller ìsch nochamol züa 20 Joohra Zuchthüüs verurtailt worra. Àm 22. Jüüni 2011 hàt àwwer dr Kassazioonshoof dia Verurtailung wage’ma Üssdrucksfahler ruckgàngig gmàcht. Noh ainem Joohr ìm Zuchthüüs vu Mìlhüüsa ìsch àlso dr Jean-Louis Muller befräijt worra.

Ìm Oktoower 2013 ìsch a näijer Prozass gsìì, dàsmol ìm Schwurgrìcht vum Meurthe-et-Moselle z’ Nànzig. Doo ìsch dr Jean-Louis Muller fräi vor àm Grìcht ärschììna. Ar ìsch vum berìahmta-n-Ànwàlt Éric Dupond-Moretti vertaidigt worra — ’s ìsch ìm Dupont-Moretti ainer vu siina wìchtigschta Prozassa gsìì. Vor da Gschwoorena hàt dr Dupont-Moretti a laawendsgreessa Wììderzammasätzung mìt da Tìsch vum Schpììlzìmmer vum Muller siim Wohnhüüs gmàcht. Ar hàt zaigt, àss dr Märder grààd hìnter àn dr Brigitte Muller hàt müassa schteh, fìr sìe ärmoordra; àwwer dàs säjg nìt meeglig gsìì, dänn’s sìnn Blüattropfa rìngsdrumm gsìì. Ar hàt domìt bewììsa, àss dr Jean-Louis Muller hatt müassa schwaawa, fìr siina Fràui ärmordra. Dia Bewiisung hàt d’ Gschwoorena schtàrk ìwwerziigt. Züadam hàt dr Hans-Peter gsajt, àss d’ Brigitte Muller àm Oowa vum 8. Nowamber 1999 „gschlààga“ gsìì-n-ìsch. D’ Vertaidigungsànwàlt hann àui s’ Gschah unterschtriicht, àss vììl Blüat ìm rachta-n-Ärmel vu dr Brigitte Muller gsìì-n-ìsch — wàs d’ Woohrschiinligkait vu’ma Salbschtmord düat verschtärka. Viar Taaga vor’m And vum Prozass ìsch àwwer a unärwàrteta Ziiga-n-üssààga gsìì: a Schàndàrm hàt sìch ärìnnert, àss dr Jean-Louis Muller sìch gdüscht ghàà hàt, grààd vor äbb d’ Schàndàrma ìm Wohnsìtz z’ Ìngwiller kumma sìnn. Dr Müller hatt ìn da Schàndàrm gsajt ghàà, àss’r Blüat uff’m Kärwer ghàà hàt.

Àm 31. Oktoower 2013, noh mehrera Schtunda Berootung, ìsch dr Jean-Louis Muller fräigschproocha worra.

noh da Prozassa

Noh siim Fräischpruch hàt dr Jean-Louis Muller gsajt, àss d’ frànzeescha Juschtiz „sìch làss geh“, un àss’r berait ìsch mìtz’halfa, fìr d’ Grìchtsverfàhra verbässra. Ìn siina Àuiga solla siina Prozassa a Lehrschtìckla wara, fìr kìnftiga Juschtizìrrtummer vermaida. Dr Jean-Louis Muller hàt vum frànzeescha Schtààt a Äntschaadigung vu 2,1 Milioona Öiro gfordert, dänn’r hàt trotz siinera Unschuld 600 Taaga-n-ìm Gfangniss verbrocht. Ar hàt z’äärscht ìm Septamber 2014 a Prowisioon vu 145.000 Öiro bikumma, un drnooh a Äntschaadigung vu 367.551 Öiro ìm Hornung 2015. Ìm Hornung 2016 ìsch dia Äntschaadigung uff 410.000 Öiro gschtììga. Ìm saalwa Monet hàt jedoch dr Jean-Louis Muller dr frànzeescha Schtààt ààklàgt, dänn’r säjg nìt gnüag äntschaadigt worra.

Àm 5. Nowamber 2014 sìnn dr Farnsahkànàl Arte un d’ Gsällschàft Maha Productions vum Owerlàndsgrìcht Pàriis verurtailt worra, wial ìn’ra Folga vu dr Sandung Intime conviction d’ Unschuldsvermüatung vum Jean-Louis Muller nìt reschpäktiart worra-n-ìsch. D’ Folga hàt nìt därfa üssgschtràhlt wara.

Nohdam àss dr Éric Dupont-Moretti ìm Jüüli 2020 àls frànzeescher Juschtizminìschter ärnännt worra-n-ìsch, hàt dr Jean-Louis Muller àm Farnsah grädd, fìr sii ehamààliger Vertaidigungsànwàlt loowa.

Zittungsàrtìckel

• Éric Nicolas: Nancy : Jean-Louis Muller, double condamné puis acquitté. In: L’Est républicain. 23. August 2021, archiviert vom Original am 24. August 2021; abgruefen am 11. Mai 2022 (französisch). 
• Ondine Millot: Mystère Muller. In: Libération. 24. Juni 2010, archiviert vom Original am 24. Februar 2022; abgruefen am 11. Mai 2022 (französisch). 
• Le Dr Muller condamné en appel à 20 ans de réclusion. In: Le Nouvel Observateur. 23. Juni 2010, archiviert vom Original am 24. Februar 2022; abgruefen am 11. Mai 2022 (französisch). 
• Procès : le légiste, le mystérieux suicide de sa femme et le revolver. In: Le Nouvel Observateur. 21. Oktober 2013, archiviert vom Original am 24. Februar 2022; abgruefen am 11. Mai 2022 (französisch). 
• Julie Saulnier: Le Dr Muller est-il l'auteur d'un crime parfait ? In: L’Express. Archiviert vom Original am 24. Februar 2022; abgruefen am 11. Mai 2022 (französisch). 
• Anne-Sophie Hojlo: Procès Muller : Ce n'est pas moi qui l'ai tuée. In: Le Nouvel Observateur. 22. Oktober 2013, archiviert vom Original am 24. Februar 2022; abgruefen am 11. Mai 2022 (französisch). 
• Anne-Sophie Hojlo: Procès du Dr Muller : Vous êtes chutologue ou balisticien ? In: Le Nouvel Observateur. Archiviert vom Original am 24. Februar 2022; abgruefen am 11. Mai 2022 (französisch). 
• Ondine Millot: Le nouveau visage du docteur Muller à son troisième procès. In: Libération. 23. Oktober 2013, archiviert vom Original am 24. Februar 2022; abgruefen am 11. Mai 2022 (französisch). 
• Soren Seelow: Le docteur Muller acquitté du meurtre de son épouse. In: Le Monde. 31. Oktober 2013, archiviert vom Original am 22. April 2022; abgruefen am 11. Mai 2022 (französisch). 
• Le Dr Muller, accusé du meurtre de sa femme, acquitté. In: L’Express. 31. Oktober 2013, abgruefen am 11. Mai 2022 (französisch). 
• Le Dr Muller finalement acquitté du meurtre de sa femme. In: Le Nouvel Observateur. 31. Oktober 2013, archiviert vom Original am 24. Februar 2022; abgruefen am 11. Mai 2022 (französisch). 
• Julie Saulnier: Procès du Dr Muller: un acquittement pas comme les autres. In: L’Express. 1. November 2013, archiviert vom Original am 24. Februar 2022; abgruefen am 11. Mai 2022 (französisch). 
• Après trois procès, le docteur Muller acquitté. In: Paris Match. 1. November 2013, archiviert vom Original am 24. Februar 2022; abgruefen am 11. Mai 2022 (französisch). 
• Affaire Muller: la très étonnante "fiction" qui conduit Arte au tribunal. In: TéléObs. 25. Februar 2014, abgruefen am 11. Mai 2022 (französisch). 

Brìcht àm Rundfunk un Farnsah

• Muller contre Muller. In: Faites entrer l’accusé, 1. Nowamber 2014, moderiart vu dr Frédérique Lantieri uff France 2 (frànzeesch).
• Un bien étrange suicide. In: Indices, àm 10., 16 un 18. Jüüni, 1. un 30. Dezamber 2017 uff’m Kànàl Numéro 23 (frànzeesch).
• L'affaire du docteur Muller : "une victoire de la Justice contre l'injustice". In: Crimes à l'Est uff France 3
• Un innocent trop confiant vu dr Ketty Rios Palma un dr Florence Cassez / 52’ / Raiha Dans les yeux de Florence uff Planète + CI, ànna 2016 (frànzeesch)
• Der Fall Brigitte Muller. In: Doku Täterjagd. ZDFinfo, 2018, abgruefen am 11. Mai 2022. 
• L'affaire Jean-Louis Muller (18 Oktoower 2013) un Autopsie du procès Muller àm 4. Nowamber 2013, in: L’Heure du crime, moderiart vum Jacques Pradel uff RTL (frànzeesch).
• Jean-Alphonse Richard, Marie Bossard: L'affaire du docteur Muller : les secrets du pavillon d'Ingwiller. RTL, 8. November 2021, abgruefen am 11. Mai 2022 (französisch). 
• Sebastien Baer: L’acquittement de Jean-Louis Muller. Radio France, abgruefen am 11. Mai 2022 (französisch).