Morphin
Morphin, in dr Umgangssprooch hüfig Morphium, isch e Haupt-Alkaloid vom Opium und ghöört zu de Opiate bzw. Opioide. Es wird in dr Medizin as äins vo de sterkste bekannte natüürlige Schmärzmiddel (Analgetikum) iigsetzt. Es isch s erste Alkaloid, wo in Reinform isoliert worden isch.
Vorkomme und Biosynthese
[ändere | Quälltäxt bearbeite]S Morphin wird us Opium, d. h. us em drochnete Milchsaft vom Schloofmoon (Papaver somniferum), gwunne. D Totalsynthese isch düür und liiferet nume chliini Usbütene – bi dr Fuchs-Synthese si s öbbe 10 %. D Usgangsstoff drfür si Phenylalanin und 4-Hydroxyphenyl-acetaldehyd. S Norcoclaurin isch e wichdigs Zwüschebrodukt. Über Reticulin wärde denn d Morphinan-Alkaloid bildet, wo s Morphin drzue ghöört.
Au Süüger chönne Morphin enzymatisch us L-Tyrosin und L-Dopa ufbaue.
Aawändig
[ändere | Quälltäxt bearbeite]Morphin wird zur Behandlig vo starke und sterkste Schmärze verwändet. Es git s in dr Form vo Retard-Kapsle und -Dablette, Bruusedablette, Dropfe, Retard-Granulat, Zäpfli, Pflaster und Injekzioonslöösige.