Minnie Weber

Us der alemannische Wikipedia, der freie Dialäkt-Enzyklopedy
Hops zue: Navigation, Suech

D Minnie Weber (Mina) isch am 27. Aprelle 1891 z Lieschtl uf d Wält cho und am 6. Meie 1984 z Gälterchinde gschtorbe. Si isch reformiert, Bürgere vo Reigoldschwil und Gschäftsleitere gsi.

Yri Härkunft[ändere | Quälltäxt bearbeite]

D Minnie Weber isch d Tochter vom Wilhelm Weber, Metzger, und vo dr Mina Buser gsi.

Yre Bruef[ändere | Quälltäxt bearbeite]

D Minnie Weber het sich zur Modischtin lo uusbilde. Drno het si aber in dr Gaschtwirtschaft vo dr Mueter in dr Hofmett z Gälterchinde mitghulfe. Neben im Wirte hei si dörte no Ruuntäfäli gmacht. Alli Familieaaghörige hei in dem Betrib gschafft und au no ei bis zwe Mitarbeiter. Nach em Ustritt vo yrem Brüeder us em Betrib het d Minnie Weber mit yrer Schweschter Julie zäme d Ruuntäfeli-Fabrik überno und isch jetze d Gschäftsfüerere gsi. Si het dr Ussedienscht vo dem chline Unternääme gmacht. In de 30er Joore si die „Handelsreisende“ alles Manne gsi, e ächte Mannebruef. D Minnie Weber isch eini vo de erschte Fraue gsi, wo in die Mannedomäne ydrunge isch. Dr Umschtand, dass d Schefin sälber zu de Widerverchäufer, de Konfiserye und Warehüüser gange isch, het allwäg einiges zum Erfolg vom Unternäme bytreit. D Ufträg hei zuegno und d Gaschtwirtschaft het dorum müese ufgee wärde. S Platzproblem het chönne mit ere nöierboute Ligeschaft glöst werde. Im Joor 1954 hei die beide Schweschtere yres Rezäpt und d Werkzüg an e Konfiseryfabrik im Aargau verchauft und hei sich zur Rue gsetzt. D Minnie Weber isch, als einzigi Frau, Mitglyd vom Rotary-Club Bärn gsi.

Literatur[ändere | Quälltäxt bearbeite]

Bricht us ere Familiechronik vom Willy Weber-Thommen, Ruuntäfelifabrikant z Gälterchinde.

Weblink[ändere | Quälltäxt bearbeite]