Michael Maggi

De Michael Maggi [ˈmadʒi] (* 29. September 1807 z Monza; † 1881) isch en italienische Immigrant i de Schwiz gsii. Si Soo, de Julius Maggi, isch de Gründer vo de Maggi-Werch z Kemptthal ZH. Z Züri-Affoltere haisst e Strooss nochem Michael Maggi.

s Lebe

De Michael Maggi stammt us de lombardische Stadt Monza (Italie) und isch ane 1828 as politische Flüchtling i d Schwiz cho, won er s Börgerrecht vo Zöri-Affoltere öbercho het. Im Joor 1839 het er z Frauefeld d Noimöli erworbe und ane 1856 d Blaichiwise nebet de Möli samt de Wasserrecht. Ane 1861 het er d Hammermöli im Zörcherische Kemptthal gchauft. Im Joor 1867 hend sini Noofolger d Möli und Wees z Frauefeld a s Underneme Martini, Tanner & Cie. verchauft und de Firmesitz uf Kemptthal verlait.

d Famili

De Michael Maggi het em 30. Mai 1839 d Sophie Esslinger ghüroote, d Töchter vom Zörcher Groossroot Johannes Esslinger. Die het e drüüjöörige Bueb mit i d Ehi broocht und em Michael vier Töchtere und e Bueb gschenkt. Si anzige Soo, de Julius Michael Johannes Maggi het ane 1869 d Hammermöli z Kemptthal öbernoo. Er het de Betriib erwitteret und ase d Maggiwerch is Lebe grueffe.

Literatur

• Beat Gnädinger: Frauenfeld: Geschichte einer Stadt im 19. und 20. Jahrhundert; Frauefeld 1996. ISBN 3-7193-1115-5
• Arthur Dürst: Gang dur Alt-Züri (Site cha nüme abgrüeft wärde; Suche im Webarchiv)[1] [2] Vorlage:Toter Link/www.gebrueder-duerst.ch. 31. Augste 2010.