Meşale Tolu
D Meşale Tolu (* 1984 z Ulm) isch e dytschi Schurnalischti.
Lääbe[ändere | Quälltäxt bearbeite]
Si isch z Ulm ufgwachse un het dert s Abitur am Anna-Essinger-Gymnasium gmacht. Z Frankfurt am Main het si uf Lehramt fir Gimnasie mit dr Fächer Ethik un Spanisch studiert. Anne 2007 het si di dytsch Staatsburgerschaft iberchuu un derno di tirkisch ufgee. D Tolu het ehrenamtlig as Schurnalischti un Ibersetzeri fir di sozialistisch Nochrichtenagentur ETHA gschafft. Vorhär het si fir dr Radiosänder Özgür Radyo gschafft, bis dää am 4. Septämber 2016 dur e Dekret vum Staatsbresidänt Recep Tayyip Erdoğan verbote woren isch. D Tolu isch ghyrote mit em Schurnalischt Suat Corlu un het mit ihm e Suhn (* 2014). Wu dr Suhn uf d Wält chuu isch, isch d Familie in d Tirkei zoge.
Ihre Mann isch am 4. April 2017 verhaftet wore un in Untersuechigshaft chuu. Am 30. April 2017 isch au d Meşale Tolu verhaftet wore. Ihre wird vorgworfe, si sei Mitglid vun ere »terroristische Organisation« un heb fir die Propaganda gmacht. Am 6. Mai het e Richter Haftbefähl erloo, drnoo isch si im Istanbuler Frauegfängnis inhaftiert gsi. Dr Dytsch Schurnalischteverband het des e „dreiste Willkürakt der türkischen Autokratie gegen die freie Presse“ gnännt.
Am 18. Dezämber 2017 isch d Meşale Tolu us dr Haft entloo wore, het aber d Tirkei nit derfe verloo.[1] Ihre Mann isch scho Ändi Novämber vorlaifig uf freie Fueß gsetzt wore, wel e Gricht z Istanbul dr Haftbefähl gege ne glupft het.[2] Am 20. Augschte 2018 het e Gricht d Uusraisespeeri gege d Tolu ufglupft, nit aber die gege ihre Mann.[3] Am 26. Augschte isch si uf Dytschland retuurchuu.[4]
Weblink[ändere | Quälltäxt bearbeite]
- Journalistin aus Ulm in Türkei verhaftet, SWR, 11. Mai 2017.
- Deutsche Journalistin verhaftet, Deutschlandfunk, 11. Mai 2017.
- Deutsche Journalistin in der Türkei verhaftet. Neues Deutschland, 11. Mai 2017.
- Willkürliche Festnahme: Interview mit dr Gülay Tolu, dr Schweschter vu dr Meşale Tolu. Neues Deutschland, 11. Mai 2017
- Linke Journalistin im Knast, Junge Welt, 11. Mai 2017.
- Bundesregierung fordert Zugang zu inhaftierter Deutscher, Spiegel, 12. Mai 2017
Fueßnote[ändere | Quälltäxt bearbeite]
- ↑ Mesale Tolu kommt frei - darf Türkei aber nicht verlassen, Spiegel Online, 18. Dezämber 2017
- ↑ Ehemann von Mesale Tolu aus türkischer Haft entlassen, Tagesspiegel, 29. Novämber 2017
- ↑ FAZ.net 20. Augschte 2018: Ausreisesperre gegen Mesale Tolu aufgehoben
- ↑ Mesale Tolu ist wieder in Deutschland, FAZ, 26. Augschte 2018