D Martin-Luther-Kirch z Ulm

Us der alemannische Wikipedia, der freie Dialäkt-Enzyklopedy
Dialäkt: Schwäbisch

D Martin-Luther-Kirch z Ulm isch baud worda em Johr 1928, vom Architekda Theo Veil. Er hod se enna fascht ganz aus Holz gmacht, draußa hod r donkle Backstoin verwendet. Sein Durm hod r gromm (vürdräht) drufgsetzt, so dass des ällas zemlich neimodisch drherkommt. En dr Kirch drenna hod dr Martin Scheible zemlich viel Figura aus Dannaholz gschnitzd. Au dr große Heiland am Greiz isch von am gmacht.

D Martin-Luder-Kirch mit em schrega Durm

Dui Kirch isch guat bsuacht weil se em Gegasatz zom Münschter, au im Wenter ghoizt isch. Bsonders schea isch emmer d Albaländischa Weihnacht, weil do uff Schwäbisch ond Alemannisch geschwätzt ond au erzehld wird. Drzwischa gibds Stuabamusik zom ahära.

Au dr Uli Keuler kommd vorbei und spield sei schwäbisches Programm. Ond dr Mondard-Pfarrer Rudolf Paul war do ond hot a Schwäbischa Kirch mit em Schwäbischa Albverei zamma ghalda.

Ond au sonscht send oinige nädde Konzert dren mit alder ond nuier Musik aus älle Johrhonderd. Äll zwoi Johr kommed Posauna aus am ganza Lendle zom Landesposaunadag au end Martin-Luther-Kirch, moischt de Jonge.

D Orgel ischd scho ald (1928) ond se hod ab ond zua aus am letschda Loch pfeifd, se ischd drom zwischa 2008 ond 2010 griechded wore. Glogga send vier uf am Durm. Uff dr kloinschda Glogg stohd a Spruch von Jesus druff: "Lannd doch au dia Kenderla zo mer komma ond wehret ehne ed!". Dui Glogg läuded emmer, wenn a Dauf grad isch. Wenn ma aber S Vatteronser grad mitnander bäded, dann gibs dofir au a Glogg, a greasere.

Ganz oba auf dr Spitz hots a scheans Kreiz; do fliagat – wenn ma gnau naguckt – goldig ahgmohlde Sternla drom rom.

Weblingg[ändere | Quälltäxt bearbeite]

 Commons: Martin-Luther-Kirche (Ulm) – Sammlig vo Multimediadateie

Koordinate: 48° 23′ 33,4″ N, 9° 58′ 47,5″ O