Mariele Loy

D Maria „Mariele“ Loy (* 17. Juni 1951 z Hofsgrund as Maria Lorenz) isch e dytschi Dialäktdichteri.

Lääbe

D Mariele Loy isch z Hofsgrund am Schauinsland uf eme Gassesepplehof ufgwachse. Mit 13 Johr isch si uf s Internat z Lohr gange. No dr Schuel het si ne Lehr as Chindergärtneri am Seminar z Fryburg gmacht.

Si het as Chindergärtneri gschafft, bis ihri Chinder uf d Wält chuu sin. Si isch ghyrote mit em Hartmut Loy (* 1944) un het mit ihm zwai Chinder. Bis anne 1994 het d Familie z Fryburg gwohnt, derno sin si uf Hofsgrund zoge.

Aagregt dur e Vordrag vum Gerhard Jung z Hofsgrund het si 1998 aagfange mit Schrybe uf Alemannisch, bi re Fahrt mit em Bus uf Fryburg heb si d Idee fir ihre erscht Gedicht „Stubenfliege“ ghaa. Aafangs het si nume fir si sälber gschribe, Gedicht, Gschichte, Sketsch. Wu d Ortsgruppe Dreisamtal vu dr Muettersproch-Gsellschaft im nämlige Johr zue me Dichterwettbewärb ufgruefe het, het si mit ihrem Gedicht „Stubenfliege“ dr erscht Bryys gwunne. Dr Klaus Poppen het ere Muet gmacht, wyter z schrbye. Si het s Dichterseminar vu dr Muettersproch-Gsellschaft bsuecht un het uf Lääsige ihri Sache vorgstellt. Anne 2000 het si unter em Titel Eso isch es - Allerlei Greimts und Ungreimts in Hofsgrunder Alemannisch en Uuswahl vu Gedicht un Gschichte publiziert. Bis hite het si insgsamt sechs Bändli mit Gedicht un Gschichte vereffetligt, alli im Aigeverlag.

Anne 2014 het si bim Wettbewärb Lahrer Murre mit em Gedicht „Regebogewunder“ dr erscht Bryys in dr Kategory „Lyrik“ gwunne.

Zue me Ufdritt vun ere schrybt d Zytig „Dreisamtäler“:

„Wie man mit der alemannischen Sprache spielen, dichten und verdichten kann, zeigt dieser Abend. Die Themen sind so vielfältig wie das Leben, die Natur und die Menschen. Die Beobachtung einer Stubenfliege oder eines Löwenzahnes ist es wert, darüber zu schreiben und wer das „Hofsgrunder Wetter“ nicht kennt, lernt es an diesem Abend kennen. Es „menschelet“ in den erfundenen oder erlebten Geschichten und der „Karli“ gehört dazu. In kleinen, kabarettistischen Einlagen findet sich mancher Zuhörer sicher wieder.“

– Dreisamtäler

D Mariele Loy bietet zäme mit ihrem Mann au gfierti Wanderige fir dr Schwarzwaldverain aa, si macht Fierige im Burehofmuseum „Schniiderlihof“ un uf em „Hofsgrunder Erlebniskrütterpfad“.

Wärch

• Eso isch es. Hofsgrund 2000
• Allewiil degege. Hofsgrund 2002
• Loos emol
• Stilli Zit, heiligi Zit, o du liebi Zit
• Nit für unguet
• Do lueg ane

Weblink

• d Mariele Loy uf dr Websyte vu dr Muettersproch-Gsellschaft
• Mariele Loy aus Hofsgrund - über 350 alemannische Gedichte und Geschichte, Badische Zeitung, 24. Mai 2002, online uf frsw.de