Lore Fischer (Sängerin)
| Dialäkt: Schwäbisch |
D Lore Fischer (* 27. Mai 1911 z Stuegert, † 16. Okdobr 1991 en Mincha) ischt a deitscha Sängere mit dr Stemmlag „Alt“ ond a Geigere gwäa.
Aus ihrem Leaba
[ändere | Quälltäxt bearbeite]D Lore Fischer ischt am 27. Mai 1911 z Stuegert uff d Welt komma. Nôch-em Abi hôt-se zerscht amôl an dr Musikhochschual vo ihrer Hoimetstadt Gsang ond s Geigaschbiil studiirt. Hendrher hôt-se ihr Studiom am Konservadoriom z Keln fortgsetzt, wo-ra d Schweizere Maria Philippi de wichdigschd Lehrere em Alt-Fach gwäa ischt. Scho em Aldr vo 23 Jôhr ischt-se a gschätzda Altischdin bei Uffironga vo Oratoria ond Kandada ond a gfrôgda Liadsengere gwäa.
Em Jôhr 1942 hôt d Lore Fischer da Bratschischda Rudolf Nel gheiradet. Zamma mit sellem ond em Stuegerter Kombonischda Hermann Reutter hôt-se s „Lore-Fischer-Trio“ bildet, wo sein musikalischa Schwerponkt uff d Barock-Musik glegt hôt. Vo dera Grubbe geit’s au etliche Schallpladda. 1953 ischt vom Ehepaar Nel/Fischer d Dochtr Kristina Nel uff d Welt komma. Dui ischt heit a Schauschbiilere, wo-ma hin ond wiidr em Fernseh siht.
Ihre ledschde Lebensjôhr hôt d Lore Fischer en Mincha vorbrôcht, wo-se am 16. Oktobr 1991 em Altr vo 80 Jôhr ihre Auga fir emmr gschlossa hôt.
Quella
[ändere | Quälltäxt bearbeite]- Friedrich Herzfeld: Das Lexikon der Musik, Verlag Ullstein GmbH, Frankfurt am Main – Berlin – Wien (1976)
- Lueg d Weblink