S Zouftwese vo Le Landeron

Us der alemannische Wikipedia, der freie Dialäkt-Enzyklopedy
Vo jedem läbige Mitglid hanget s Familiewappe i de salle de la question im Schloss. Da sind d Wappe vo de Mitglider vo St-Sébastien. Die vo St-Antoine hanget a de Wand rächts.
S neue Banner vo de Zouft St. Sebastian vo 2002
Umzug vo de Zouft St. Sebastian

D Familie vom Stedtli Landeren (Le Landeron NE) händ sich i verschidnige Organisatione organisiert: d Pfarrei für d Religion, d Bürgergmeind für de gmeinsami Psitz wie de Wald oder s Schloss und ere Zouft.

Funktione vo de Zouft[ändere | Quälltäxt bearbeite]

Hüt gits no zwei Zöift. Bi welere mer Mitglid isch hanget de vo ab, us weler Familie mer chunt. Früener sind d Zöift für iri Mitglider Bank und Versicherig gsii. Denäbet sind s verantwortlich gsi für d Stadtverteidigung.

D Zouft vom Heilige Geist[ändere | Quälltäxt bearbeite]

I de Zouft vom Heilige Geist (Confrérie du Saint-Esprit) sind under anderem Schüeler, Studänte und Ärzt gsi. Si isch 1357 gründet worde und häd en Spital betribe. Hüt gits die Zouft nüme.

D Zouft vo de Heilige Fabian und Sebastian[ändere | Quälltäxt bearbeite]

D Zöifter vo de Zouft vom St. Fabian und St. Sebastian (Honorable Confrérie des Saints Fabien et Sébastien) sind vor alem Handwärcher gsi. Bi de Stadtverteidigung händs mit de Armbruscht gschosse. Bim Umzug träged si e Armbruscht mit und im Schlosshof wird dänn gschosse. 1471 isch d Zouft, won scho elter isch, vom Rudolf vo Hochbärg, Graf vo Neueburg bestätiget worde.

I dere Zouft sind altigsässnigi Stadtbürger vo de Familie Bellenot (5%), Digier (4%), Frochaux (27%), Gicot (3%), Guenot (6%), Muriset (29%), Peroset (3%), Quellet (6%) und Ruedin (17%) (Prozentagabe 2003 vom F. Frochaux).

D Zouft vom Heilige Antonius[ändere | Quälltäxt bearbeite]

D Zöifter vo de Zouft vom St. Antonius (Honorable Confrérie de Saint-Antoine) sind ursprünglich Wiipuure gsi. Bi de Stadtverteidigung sinds Fuessoldate gsi. Si isch es bitzeli jünger wien d Zouft vom St. Sebastian und es ghööred weniger Familie dezu. Si isch 1494 vo 46 Laie und 2 Religiöse gründet worde, prichtet alti Urkunde.

D Zöift hüt[ändere | Quälltäxt bearbeite]

Hüt händ di bede Zöift vor alem gsellschaftliche Charakter. Im Läbe vo de immerno katholische Stadt und vo de Pfarrei händs e wichtigi Funktion. Im modärne (und protestantische) Dorf sinds aber fascht nöd bekannt.

Fronlichnam[ändere | Quälltäxt bearbeite]

A de Fronlichnamprozession machet ussert de Verein au die beede Zoift mit irne Panner mit.

Jaarestag[ändere | Quälltäxt bearbeite]

Am Suntig nach dem Namenstag vo irem Patron träffed sich d Zöifter zum Jaarestaag. Am Samschtig gits e Mäss für di Verstorbnige i de Pfarrchile St. Mauritius usserhalb vo de Stadtmuure. De Suntig fangt mit ere Mäss i de Kapälle vo de Zäätuusig Ritter i de Stadt aa. Nach em Gottesdienscht wird Broot verteil. Urspünglich isch das im chalte Jänner e Armespiisig gsi. Nachane isch d Jaaresversammlig im gotische Grichtsaal vom Ratshuus.

Nach de Versammlig gits en Umzuug mit Panner und Trummle. D Manne laufed i Rei und Gliid em Alter na. Früener einisch s Stedtli uf und äne wider abe zum d Kapuziner won d Mäss glääse händ heizbegleite. D Kapuziner händ grad vis-à-vis vom Rathuus gwont. Sit immer mee Zoifter nüme im Stedtli woned, gaat de Umzug halt nomals s Stedtli uf bis zum Schloss. Det ässeds mitenand Zmittag und nachane isch no d Rächnigsversammlig. Am Aabig gat de noi Zouftmäischter Chranknigi Mitglider goge psueche.

Bis vor wenige Jaar häts am Mäntig no en Zmittag gee, won au d Fraue und d Chind händ törfe cho, ursprünglich d Witwe und d Waise vo de gstorbnige Mitglider. Ales won da staat, stimt für d Zouft St. Sebastian gnau. Bi St. Antonius chas si, das e paar Detail andersch sind.

Weblink[ändere | Quälltäxt bearbeite]

Dä Artikel basiert uff ere fräie Übersetzig vu dere Version vum Artikel „Le_Landeron_(Zunftwesen)“ vu de dütsche Wikipedia. E Liste vu de Autore un Versione isch do z finde.