Kweku Adoboli

Us der alemannische Wikipedia, der freie Dialäkt-Enzyklopedy

De Kweku Adoboli (* 21. Mai 1980[1] z Ghana) isch en ghanaische Banker und ehemalige Aagstellte vo de Schwiizer Grossbank UBS.

Er het für d UBS z London gschaffet und isch derte Direkter vom Global Synthetic Equities Trading-Handelsteam vo de Bank gsi.[2][3] Am 15. September 2011 isch er z London verhaftet worde. De Vorwurf isch, dass er ohni Autorisiirig 2.3 Milliarde Dollar vo de UBS verloore het. En Sprächer vo de FINMA het sin Fall eine vo de gröschte bezeichnet, wo s je bi ere Schwiizer Bank gäh het.[2]

Am 20. November 2012 isch er vomene Gschworenegricht z London in zwei Fäll wäge Betrug schuldig gschproche worde. De erschti Schuldspruch het sich uf di erschti Zit bezoge, wo er noch kei Verlüscht gmacht het, de zweiti uf di Zit mit de höche Verlüscht. Für d Falschbuechige, wo im Zämmehang mit de Verschleierig vo sim z höche Handelsvolume schtönd, hei di Gschworene ihn freigschproche, wil si es «Mittel zum Zweck» gsi sind und nöd sinere persönliche Beriicherig golte hei. S Strofmass für di beide Schuldsprüch sind vom vorsitzende Richter uf viir und sibe Johr feschtgstezt worde, wobi sich di beide Ziitschpanne nöd düent addiire, sondern mitenand duent laufe, so dass d Haftziit vom Kweku Adoboli sibe Johr betrait. Wil nach em angelsächsische Rächt aber numme d Hälfti im Gfängnis muess verbracht werde und di ander Hälfti uf Bewährig usgsetzt isch und de Adoboli nün Mönet in Untersuechigshaft gsässe-n-isch, muess er noch für öppe zweiehalb Johr ins Gfängnis.[4]

Einzelnochwis[ändere | Quälltäxt bearbeite]

  1. Blick Online Adoboli alarmierte UBS selber über seinen Verlust. Archiviert vom Original am 25. Dezember 2011; abgruefen am 18. September 2011.
  2. 2,0 2,1 Frank Jordans. Rogue trader causes US$2 billion loss at UBS . Abgruefen am September 15, 2011. 
  3. Megan Murphy. UBS trader Adoboli held over US$2bn loss , September 15, 2011. 
  4. NZZonline: Adoboli zu sieben Jahren Haft verurteilt