Kunsthuus Baselland

Us der alemannische Wikipedia, der freie Dialäkt-Enzyklopedy
Dialäkt: Baseldütsch

S Kunsthuus Baselland isch en Instituzioon für zitgenössischi Kunst in dr Baselbieter Gmäind Muttez an dr Kantonsgränze zu Basel-Stadt, grad nääben em Joggeli. S Usstelligshuus befindet sich im ene alte Gwärbbau, wo dr Drääger vom Kunsthuus, dr Kunstveräin Baselland, 1997 kauft het. S Kunsthuus het en Usstelligsflechi vo öbbe 1'800 m².

Dr Kunstveräin Baselland organisiert sit sinere Gründig im Joor 1944 Kunstuusstellige und förderet eso die bildendi Kunst und s Kunstverständnis. Bis 1996 isch d BEWE-Sammlig (Bruno und Elisabeth Weiss) im Kunsthuus Baselland dehäi gsi, wo d Gründer von ere, dr Bruno und d Elisabeth Weiss, maassgääblig bim Chauf vo dr Liigeschaft mitghulfe häi. Sit 1998 wird s Kunsthuus vom ene brofessionelle Kuratorium gläitet. Vo 1998 bis 2001 isch dr Andreas Baur Kurator gsi. Sit 2001 isch d Sabine Schaschl Diräktere und Kuratorin.

Es git immer wider nöiji Grubbe- und Äinzelusstellige, wo aktuelli Brojekt vo etablierte und ufsträäbende Künstler zäigt wärde. Si wärde ergänzt dur Katalöög, Vordrääg, Künstlergsprööch, Diskussionsfoore und theoriiorientierti Veraastaltige. Näbe regionaale Künstler wärde au internazionaali zäigt. Im Kunsthuus Baselland findet d «Regionale» statt, e Groossveraastaltig in Kooperazioon mit öbben eme Dotzed andere Instituzioone. Si dokumentiert d Däätigkäit vo bildende Künstler, wo im trinazionaale Ruum (Nordwestschwiz, Südbaade und Elsass) lääbe.

Lueg au[ändere | Quälltäxt bearbeite]

Weblingg[ändere | Quälltäxt bearbeite]

Dä Artikel basiert uff ere fräie Übersetzig vu dere Version vum Artikel „Kunsthaus_Baselland“ vu de dütsche Wikipedia. E Liste vu de Autore un Versione isch do z finde.

Koordinate: 47° 32′ 25,3″ N, 7° 37′ 22,9″ O; CH1903: 613884 / 265531