Dr graui Star

Us der alemannische Wikipedia, der freie Dialäkt-Enzyklopedy
Hops zue: Navigation, Suech
E Katarakt im Aug vom ene Mensch.

Dr grau Star oder Katarakt [ˌkataˈʁakt] bezäichnet e Drüebig vo dr Augelinse. Wemm mä öbberem mit eme fortgschrittnige Katarakt ins Aug luegt, gseet mä, ass es hinder dr Pupille grau isch, und vo do chunnt d Bezäichnig graue Star. Die drüebi Linse cha in de mäiste Fäll operativ dur e künstligs Linseimplantat ersetzt wärde.


Operativi Therapii (Kataraktoperazioon)[ändere | Quälltäxt bearbeite]

Jeedes Joor git s z Dütschland mee as 650.000 Operazioone, wo bin ene die drüebi Linse dur e künstligs Linseimplantat ersetzt wird.[1] D Kataraktoperazioone ghööre zu de chirurgische Iigriff, wo am mäiste gmacht wärde.[2] Bis vor e baar Joor het mä operiert, wenn d Seescherfi öbbe 0,3 oder schlächter gsi isch. Hüte nimmt mä au in Betracht wie sich dr Baziänt füült, wenn er zum Bischbil stark bländet wird oder bi schwachem Liecht kuum me öbbis gseet.

D Operazioon[ändere | Quälltäxt bearbeite]

D Bedöibig[ändere | Quälltäxt bearbeite]

Mäistens brucht mä bi Kataraktoperazione örtligi Bedöibig. S Bedöibigsmiddel wird näbe („Peribulbäranästhesii“) oder hinder („Retrobulbäranästhesii“) em Augeöpfel iigsprützt, und s git denn im Idealfall nid nume käini Schmärze, sondern s Aug cha sich au nüme sälber beweege. Mänggisch wird s Bedöibigsmiddel uf d Ooberflechi vom Aug dröpfelet. Schmärze git s au in däm Fall nid, aber dr Bazient daf s Aug denn öbbe zää Minute lang wäärde dr Operazioon nid beweege.

Vollnarkose wärde sälte gmacht, vor allem wenn sisch s um s letschte Aug, wo no öbbis cha gsee, handlet, bi Paziänte mit Parkinson oder em Restless-Legs-Syndrom) oder psüchische Stöörige.

Technik[ändere | Quälltäxt bearbeite]

Kataraktchirurgii

Mä underschäidet zwäi Verfaare:

  1. S eltere wird nume no sälte aagwändet. Do wird am üssere Rand vo dr Hornhuut (Cornea) bzw. vo dr Lääderhut (Sclera) nääbedraa e lange Schnitt gmacht und die ganzi Linse wird mit oder ooni d Linsekapsle uusegnoo.
  2. Hützudags macht mä e rundi Üffnig mit eme Durchmässer vo öbbe 5 mm im vordere Kapselblatt und zerdrümmeret d Linse mit Ultraschall, so dass dr Räst vo dr Kapsle blibt, und d Linsefragmänt wärde denn abgsugt. In dr leer Kapselsack duet mä e Kunstlinse iine, wo hützudags mästens us eme elastische Material wie Silikon bestoot. D Linse cha eso gröllelet dur e Schnitt am Rand vo dr Hornhut,wo bis zu drei Milimeter lang cha si, in Kapselsack iinegschoobe, wo si sich ufröllelet und mit zwäi elastische Büügel sich sälber zentriert und fixiert.

Noch dr Operazioon wird s operierte Aug mit eme Verband zuedeckt, und wenn alles guet gange isch wird dä am Daag druf für e churzi Zit abgnoo. Dr erst Iidruck vo de mäiste Paziänte isch, dass si d Farbe vil sterker gseen und s Bild heller isch. Mit ere Kunstlinse cha s Aug d Seedistanz nüm sälber iistelle, und je noch dr Linse muess mä denn e Brülle aazie, so dass mä in d Nööchi oder in d Witi au scharf cha gsee.

Komplikazioone[ändere | Quälltäxt bearbeite]

Komplikazioone si relativ sälte.[3] Es cha intraokulari Infekzioone (Infekzioone im Innere vom Aug) gee, es cha zu Glaskörpervorfäll choo, und spööter cha die hinderi Linsekapsle drüeb wärde („Noochstar“).

Lueg au[ändere | Quälltäxt bearbeite]

Fuessnoote[ändere | Quälltäxt bearbeite]

  1. Kataraktoperation: Risikominderung einer Blutung bei oraler Antikoagulation. Dtsch Arztebl 2005; 102(1-2): A-58 / B-49 / C-46
  2. Informationsschrift des Bundesverbandes der Augenärzte Deutschlands BVA (PDF; 401 kB)
  3. Aqua-Institut, Sektorenübergreifende Qualitätssicherung im Gesundheitswesen (PDF; 962 kB) Kataraktoperation, Abschlussbericht 18. Oktober 2010, abgrüeft am 3. Oktober 2012

Litratuur[ändere | Quälltäxt bearbeite]

  • Th. Axenfeld (Begr.), H. Pau (Hrsg.): Lehrbuch und Atlas der Augenheilkunde. Unter Mitarbeit von R. Sachsenweger u. a., Stuttgart: Gustav Fischer Verlag, 1980, ISBN 3-437-00255-4
  • Albert J. Augustin: Augenheilkunde. Berlin: Springer Verlag, 2007, ISBN 978-3-540-30454-8
  • David Allen, Abhay Vasavada: Cataract and surgery for cataract. BMJ. 2006 Jul 15;333(7559):128-32. Review. PMID 16840470
  • Kataraktbildung bei Ichthyose Bullosa Siemens: Intensivkurs Dermatologie von Alexander Meves, J Albrecht (Seite 171).

Weblingg[ändere | Quälltäxt bearbeite]

 Commons: Katarakt – Sammlig vo Multimediadateie
Gsundheitshiwiis Bitte tue de Hiwiis zu Gsundheitsthemene biachte!
Information icon.svg Dä Artikel basiert uff ere fräie Übersetzig vum Artikel „Katarakt_(Medizin)“ vu de dütsche Wikipedia.

E Liste vu de Autore un Versione isch do z finde.