Karaburun-Tragödie

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D'Karaburun-Tragödie isch e Boot-Unfall z'Albanie im Januar 2004 gsi, wo zunere politische Krise gführt het.

Graffiti z'Tirana us derre Zit

Am 9. Januar 2004 isch e Schnällboot, wo zum Mänscheschmuggle bnutzt worre isch, 7 km vo dr Halbinsel Karaburun entfernt kentert. Di nüünezwanzig Isasse hen noo versuecht mit ihri Handys d'Polizei un s'Fernsehe z'informiire. Am näggschte Morge hen 8 Lüüt grettet werre chönne, 21 sin ertrunke. D'Opfer sin vor allem us dr nordalbanischi Städt Shkodra un em Hochlandbezirk Malesi ë Madhe cho. Spöter isch entdeggt worre, dass di zwee Schlepper Verwandti vo Polizeibeamte z'Shkodra un z Vlorës gsi sin.

D'Tragödie isch schnäll zumene politischi Skandal worre, zum eine wäge denne zwee Beamte, zum andre wyl dr albanischi Premierminischter Fatos Nano, wo grad im Urlaub gsi isch, erscht drüü Daag spöter zruggcho isch. Dr Fatos Nano het zwei Joor vorher d'Mänscheschmuggel eigetlich für beendet erklärt un jetzt isch ihm vorgworfe worre nüt gnueg unterno z'ha. D'Opposition het im Parlament e Misstrauensvotum aazettelt, het sich aber gäge d'Mehrheit vo dr Regiirig nüt chönne durchsetze.

I ganz Albanie isch gäge de Fatos Nano demonschtrirt worre. Mehreri Organisatione, wie zum Byschpil Mjaft! hen Aktione durchgführt. Mjaft! het vorem Büro vum Fatos Nano e öffentlichi Trauer abghalte. Vorem Büro isch e Schild ufgstellt worre mit dr Ufschrift Kujdes! Lart nuk punohet (Ufpasse, doo obe wird nüt gschafft, e Allusion zu Schilder wo uf Baustelle stönn: Kujdes! Lart punohet, Ufpasse doo obe wird gschafft). Usserdäm isch überall i dr Stadt dr Slogan Nano ik (Nano verschwind) ufgsprüht worre.

D'EU isch allerdings au i d'Kritik groote, vor allem wege de scharfe Visavorschrifte, wo's de meischte Albaner praktisch unmöglich macht s'Land z'verloo. Dr Fatos Nano isch bis 2005 im Amt blybe.