Küstestaat

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

E Küstestaat isch e Staat, wo vom eigene Territorium Zuegang zum Wältmeer het.

Die meiste Staate uf dr Wält si Küstestaate. De Staate, wo komplett vom Meer umgee si, saitt mä Inselstaate, Staate ohni diräkte Zuegang zum Meer nennt mä Binnestaate. Zu sälle zelt mä au Aserbaidschan, Kasachstan und Turkmenistan, wo am Kaspische Meer lige, wil das e Binnesee ohni diräkti Verbindig zum Wältmeer isch.

Dr eigeni Zuegang zum Wältmeer isch wichdig, wil e grosse Deil vom Wälthandel über d Ozean goht. Staate, wo kei sonige Zuegang hai, hai hüfig höcheri Chöste wäge Transitgebühre. In Chriegszite cha en eigene Zuegang zum Meer e wichdige strategische Vordeil si. Wil Staate en eigene Zuegang zum Meer gsuecht hai, het s mänggisch Chrieg gee drwäge.