junges theater basel

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldütsch

S junge theater basel, churz jtb, isch sit 1977 ains vo de Chlaitheater in dr Stadt Basel. Es befindet sich im ene ehemoolige Rossstall uf em Kasärneareal im Chlaibasel und het 108 Blätz.[1]

Im junge theater basel spiile Profi und Laie, im Allgemeine Jugendligi, wo Theaterkürs im Theater sälber absolviert hai. Im Johr wärde zwai Stück inszeniert, wo noch acht Wuche Broobe, an jedem Daag acht stundelang, öbbe 20 Mol z Basel sälber ufgfüehrt wärde und denn in dr Schwiiz uf Tournee gönge und mänggisch au an internationale Festival mitmache. D Uffüehrige si hüfig Stück wie im Simon Stephens si Punk Rock[2] oder im holländische Reschissör Matthias Mooij si Scham noch em Frühlings Erwachen vom Wedekind[3], wo uf Schwiizerdütsch übersetzt worde si oder Aigeentwicklige vom jtb wie s Danzstück Kei aber!.[4]

Taläntshow[ändere | Quälltäxt bearbeite]

Zeig! Offene Bühne git Jugendlige sit em Februar 2011 an jedem erste Samschdig vom ne Monet d Möglikeit, vor eme Publikum ufzdrätte und z zaige, was si chönne, wobii s kaini Vorlaage git, was si sotte uffüehre.

Theaterkürs[ändere | Quälltäxt bearbeite]

D Theaterkürs, wo jungi Mensche vo vierzähni bis vierezwanzgi chönne mitmache, finde währed dr Schuelzit zwaimol bro Wuche statt. D Dailnähmer entwickle währed em Kurs en Uffüehrig, wo denn am Schluss dreimol vor eme Publikum zaigt wird.[5]

Fuessnote[ändere | Quälltäxt bearbeite]

  1. Website vom junge theater basel Archivlink (Memento vom 28. Juli 2011 im Internet Archive), abgrüeft am 4. August 2011
  2. Website vom junge theater basel, abgrüeft am 4. August 2011
  3. Website vom junge theater basel (Site cha nüme abgrüeft wärde; Suche im Webarchiv)[1] [2] Vorlage:Toter Link/www.jungestheaterbasel.ch, abgrüeft am 4. August 2011
  4. Website vom junge theater basel Archivlink (Memento vom 30. Novämber 2011 im Internet Archive), abgrüeft am 4. August 2011
  5. Website vom junge theater basel Archivlink (Memento vom 12. Augschte 2011 im Internet Archive), abgrüeft am 4. August 2011

Weblinks[ändere | Quälltäxt bearbeite]