Inneminister

En Inneminister isch dr Läiter vom ene Inneministerium), das isch e Ministerium, wo sich um inneri Aagläägehäite, d. h. um d Verwaltig vom ene Land, vom ene Bundesstaat oder vom ene Kanton, uf dr nationale oder bundesstaatlige Eebeni kümmeret.

S Ressor vom Inneminister umfasst im vile Staate die inneri Sicherhäit, weniger in Bundesstaate wie dr Schwiz, wo das d Aagläägehäit vom Äidgenössische Justiz- und Bolizeidepartemänt und vo de Kantöön isch, oder in de Veräinigte Staate, wo s United States Department of the Interior vor allem s Land verwaltet und schützt, wo im Bund ghöört. Anderi Aagläägehäite, wo sich vilmol dr Inneminister drum kümmeret, si d Kultur-, d Sozial-, d Gesundhäits-, d Familie- und d Umwältspolitik.

D Kompetänze vom Inneminister underschäide sich aso e chlii vo Land zu Land und so au si Titel. Z Dütschland isch s uf dr Eebeni vom Bund dr Bundesinneminister, uf dr Eebeni vo de Länder dr Inneminister oder in de Stadtstaate mit Senat dr Innesenator. Z Ööstriich säit men em Inneminister oder Bundesminister für s Innere und in dr Schwiz isch s dr Vorsteher vom Departemänt vom Innere. Z Ängland häisst er minister of the interior or au minister of home affairs und z Amerika isch s dr secretary of the interior.