Dr Immigration Act vo 1924

Dr Bresidänt Calvin Coolidge underschribt s Gsetz vor em Wisse Huus. Dr John J. Pershing stoot linggs vom Bresidänt.

Dr Immigration Act of 1924, au as National Origins Act, Asian Exclusion Act oder Johnson-Reed Act bekannt, isch e rassistischs Bundesgsetz vo de USA gsi, wo d Zaal vo de Immigrante, wo jedes Joor us jedem Land in d USA häi döfe iiwandere, uf zwäi Brozänt vo dr Bevölkerig, wo scho vorhär us däm Land iigwanderet isch, begränzt het.

Inhalt und Bedütig

S Ziil vom Gsetz isch s gsi, d Immigrazioon vo Südöiropäer und Ostöiropäer, won e hufe von ene sit de 1890er iigwanderet si, iizschränke, und es het Ostasiate und Inder d Immigrazioon ganz verbote. Für d Iiwanderig us Latiinamerika het s käni Gränze gee. S Gsetz isch fast ooni Widerstand vom Kongräss aagnoo worde.

E Dail vo de Befürworter vom Gsetz si vom Madison Grant und sim Buech The Passing of the Great Race beiiflusst worde, wo 1916 erschiine isch. Dr Grant isch en Öigeniker und en Aahänger vo dr Rassehügiene gsi und het brobiert z bewiise, ass die nordöiropäische Rasse de andere überlääge sige. Aber die mäiste, wo s Gsetz understützt häi, häi vor allem dr ethnisch status quo welle bhalte und d Konkurränz vo fremde Arbäiter vermiide.

D Kwote, wo im Gsetz festgläit gsi si, si mit chliine Ändrige bis zur Verabschiidig vom Immigration Act vo 1965 in Chraft bliibe.

Weblinks

• Übersicht über die Quoten 1925-1927 of 1924
• „‘Shut the Door’: A Senator Speaks for Immigration Restriction“ — Transkription der Rede, die der Senator Ellison D. Smith am 9. April 1924 hielt
• Eugenische Gesetze, die die Immigration beschränkten

Bibliografii

• Roger Daniels: The Politics of Prejudice. The Anti-Japanese Movement in California and the Struggle for Japanese Exclusion. University of California Press, Berkley CA u. a. 1977, ISBN 0-520-03411-2, (University of California Publications in history 71), (behandelt die Entwicklung der antijapanischen Bewegung in Kalifornien vom späten 19. Jh. bis zur Verabschiedung des Immigration Act von 1924).
• Michael Robert Lemay (Hrsg.): U.S. Immigration and Naturalization Laws and Issues. A Documentary History. Greenwood Press, Westport CT u. a. 1999, ISBN 0-313-30156-5, (Primary Documents in American History and contemporary Issues).
• Aristide R. Zolberg: A Nation by Design. Immigration Policy in the Fashioning of America. Russell Sage Foundation u. a., New York NY 2006, ISBN 0-674-02218-1.

Fuessnoote

Dä Artikel basiert uff ere fräie Übersetzig vum Artikel „Immigration_Act_von_1924“ vu de dütsche Wikipedia. E Liste vu de Autore un Versione isch do z finde.