Hilf:Artikel verschiebe

Us der alemannische Wikipedia, der freie Dialäkt-Enzyklopedy

S Verschiebe vo me Artikel bezeichnet s Ändere vo derre Site Titel. Dodeby werre alli Versione mit verschobe; Bydräg vo de bedeiligte Nutzer werre im neue Titel züegschrybe. Anonyme und neue Nutzer isch sälli Funktion aber nit möglig. Es chönne usser Kategorye Site uss allne Namesrüm verschobe werre. Au s Verschiebe in e andere Namesrum isch möglig. Witerleitige werre im Verschiebigs-Logbüech dokumentiert.

Wenn dr de Name vo me Artikel wottsch ändere, no findsch über sinem Titel rächts, normalerwis rächts neb em Stern zwüsche de Schaltfläche „Versione“ und em „Suechfeld“, unter 'Meh' e Schaltflächi mit em Tekscht „Verschiebe“. Deno chunnsch zu me Formular, wo dr de neu Titel vom Artikel agee müesch (lüeg Bild). D'Agab vo me Grund isch freiwillig. Drunder findsch usserdem e Liste zum Achrüze, ob dr d'Diskussionssite mitverschiebe wottsch (säll goht numme, wenn dr nit in e andere Namesruum verschiebsch und's no kei Diskussionssite mit em neue Name git), e Witerleitig hinderlo wottsch (säll sott mer mache, wenn de alt Titel nit irgendwie falsch isch) und bi Site usserhalb vom Artikel-Namesruum ob dr d'Undersite au verschiebe wottsch. Deno klicksch uff „Artikel verschiebe“.

S Verschiebigsformular


Achtig: We'mer e Artikel verschiebt, no werre Link vo andere uff de verschobe Artikel nit gändert. Sällewäg müesch si ändwäder vo Hand überall ändere (e Liste vo Site, wo uff de Artikel verwyse, chasch über d'Site Spezial:Was verwyyst do druff? uffrüefe) oder bim Verschiebe e Witerleitig hinderlo.

Wenn dr e Site verschiebsch, no sottsch au druff achte, dass keini Doppelte Witerleitige entstönn: wenn e Witerleitig züe-n-re andere Witerleitig fiehrt, no blibt mer bi säller zweite Witerleitig stoh, anstatt dass mer diräkt zu de gsüechte Site gfiehrt wird. Witerleitige uff de alt Titel vom Artikel sotte also gändert werre, sodass si uff de neu Titel verwyse.

Bitte beacht au, dass d'Titel vo Artikel allewyl uff Hochdütsch sy mien; Alemannischi Witerleitige oder Artikel under Alemannische Titel sin nit gwünscht.