Gozbert

es Bild vom ene ideale karolingische Chlooschter, wie s dr Plan i dr Chlooschterbiblioteek Sanggalle us dr Zyt vom Apt Gozbert zeigt

Dr Gozbert († 4. April, öppen im Joor 850, i dr Rhynau) isch Apt vom Chlooschter Sanggallen und drno vom Chlooschter Rhynau gsi.

Sid em Joor 798 isch dr Gozbert als Mönch vom Chlooschter Sanggallen erwäänt, anne 811 s erschte Mol au als Prieschter. Im Joor 816 het men en zum Apt vo däm alte alemannische Chlooschter gwäält.

E schwiregi Sach isch dozmol für Sanggalle d Macht vom Bischof vo Konschtanz gsi, wo s Chlooschter ganz hätt welle kontroliere. Dr Apt Gozbert het denn vom Kaiser Ludwig anne 818 en Urkunden überchoo, won em Chlooschter d Unabhängikeit garantiert het. Bsunders isch dr Mönchsgmeinschaft au zuegsicheret worde, ass si iren Apt sälber törf wääle.

Dr Gozbert het d Verwaltig vom Chlooschter verbesseret und modernisiert, und er het ganz im Sinn vo dr karolingische Kulturreform speziell au d Schrybstube pflägt, wo me hütt no schöni Wärch drvo i dr berüempte Stiftsbiblioteek ufbewahrt.

I dr Zyt vo 830 bis 835 isch under em Apt Gozbert die nöi karolingisch Gallusbasilika fürs Chlooschter bout worde. D Chilewei vo anne 835 muess es grosses Fäscht gsi sy; dr Bischof Ulrich vo Basel, dr Bischof Wolfleoz vo Konschtanz und dr Apt Erlebald vo dr Rychenau sind derby gsi.

Anne 837 isch dr bedütend Apt vo sim Ampt zruggträtte; er isch spöter Apt im Chlooschter uf dr Inslen i dr Rhynau worde, won er öppe anne 850 gstorben isch.

Literatur

• Johannes Duft: Gozbert. In: Historisches Lexikon vo dr Schwiiz.