Geometrischer Stil

Dr geometrischi Stil (öbbe 900 – 700/675 v. Chr.) isch e Kunststil in dr griechische Kunst. Vo däm kunsthistorische Begriff isch dr Naame für d Perioode, wo dä Stil im antike Griecheland vorgherscht het, abgläitet worde und mä bezäichnet die Zit as die geometrischi Zit oder as d Zit vom geometrische Stil.

Mä däilt si in drei Faase ii: die vom früegeometrische Stil (öbbe 900–800 v. d. Z.), die vom hochgeometrische Stil (öbbe 800–740 v. d. Z.) und die vom spootgeometrische Stil (öbbe 740–700 v. d. Z.).

Mä cha in däm Stil s Wääse vo dr antike griechische Kunst und Religiosideet gsee. Im 9. Joorhundert v. d. Z. hersche sträng geometrischi Ornamänt wie Meander vor. Näbe de ornamentale Fries si figürligi Daarstellige in dr griechische Waasemoolerei immer bedütender worde. Au in dr Blastik chömme denn vo 770/750 v. d. Z. figürligi Usdrucksforme vor. Mäistens si daas Gfäässufsetz gsi, wo immer mee Beweegig daargstellt häi. Die Daarstellige si nume 10–20 cm hooch, und es chömme äifachi Grubbekomposizioone vor wie Grubbe vo Löije wo kämpfe oder müthologischi Gstalte wie Kentaure.

Die bäide Kunstforme si d Vorlöifer vo de Dierfries und Figurebilder vom Archaische Stil. Denn im Joorhundert vom Homer wird noch 750 v. d. Z. die sträng geometrischi Richdig vom Stil ufglööst. Es git denn nid nume friidligi Dier uf de Fries sondern au Faabelwääse und Raubdier und mä het aagfange, Saage daarzstelle.

Litratuur

J. N. Coldstream: Greek geometric pottery. A survey of ten local styles and their chronology (= Methuen's handbooks of archaeology). Methuen, London 1968.
Werner Fuchs: Die Skulptur der Griechen. Ufnaame vom Max Hirmer. 4. Uflaag. Hirmer, Münche 1993, ISBN 3-7774-6100-8, S. 17–20, 153–154, 247, 323–325

Weblingg

Commons: Geometrischer Stil – Sammlig vo Multimediadateie

Dä Artikel basiert uff ere fräie Übersetzig vum Artikel „Geometrischer_Stil“ vu de dütsche Wikipedia. E Liste vu de Autore un Versione isch do z finde.