Fasnachts-Comité

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldytsch

S' Fasnachts-Comité (Oft numme Comité, aber au Offiziells Fasnachts-Comité) isch dr offizielli Organisator vo dr Basler Fasnacht.

Uffgoobe vom Comité[ändere | Quälltäxt bearbeite]

S' Fasnachts-Comité organisiert e jedes Joor dr Cortège am Fasnachts-Mäntig und -Mittwuch Noomidaag. Usserdäm bemieht me sich fyr die ganzi Fasnacht vernympftigi Raahmebedingige schaffe z' kenne. Yber d' Ussgoob vonnere Fasnachtsblaggedde und Bättelaggzione duet s Comité die aagschlossene Grubbe leischtigsbezooge subvenzioniere (Lies au: Problematigg)
Usserdäm wird jedes Joor, kurz vor dr Fasnacht, e Heftli namens "Rädäbäng" druggt, wo alli Grubbene mit ihrem Sujet und witterfierende Informatione uffglischtet sin.

Rund um d' Fasnacht[ändere | Quälltäxt bearbeite]

Vor dr Fasnacht isch s' Comité verantwortligg fyr d' Organisation und Ussfiehrig vom Monstre-Drummelkonzert (Drummeli) und hets Patronat bim offizielle Bryysdrummle und -pfyffe. Noo dr Fasnacht findet denn die erschti Lektion statt, e Noochwuggsfeerderig, wo mit zahlriiche Mitmach-Aggzione fyrs Larve-kaschiere und -moole, fyrs Ladärnemoole und nadyyrligg fyrs Drummle und Pfyffe duet wärbe.

Fyr neu zuezoogeni Exil-Zyrcher und sunschtigs fasnachtsfremds Fuessfolgg bietet me Informationveraastaltige aa.

Nadyyrligg gheerts au zue de Uffgoobe vom Comité d' Beziehig zue de aggtive Fasnächtlerinne und Fasnächtler uss allne[1] Grubbierige z' pfläge.

Witter isch me allewyl im Gspreech mit de Gremie vo de Inträsseverein (IG Gugge, FG Gugge, IG Wage, IG Tambouren- und Pfyffergrubbe, IG Chaise und au em Schnitzelbank-Comité) und hegt frindschaftliggi Kontaggt mit Beheerden und andre Inschdituzione (Regierig, Polizey-Deppartemänt, BVB, Baudepartemänt, Basel Tourismus).

S' Comité fiehrt e aiges Fasnachtsarchiv und ybergit alte Grimpel em Staatsarchiv zur wittere Uffbewaarig (Änd-Deponii).

Problematigg[ändere | Quälltäxt bearbeite]

Nid alli Clique und Fasnachts-Grubbierige hänn sich unterem Fasnachts-Comité zämmegschlosse. E wichtige Bestandteil vo dr Basler Fasnacht isches, dr Obrigkeit dr Spiegel vor d' Naase z' hebe und uff alles ufmerksaam z' mache was nid eso guet lauft in dr Wält. Drumm hänn ainigi Grubbe Mieh sich ere Organisation unterzstelle wo reguliert, bewärtet und kontrolliert. Anderi sinn mit em Fasnachts-Comité nid z'friede und hänn aigeni Comités grindet (z.B: Comitée2000[2])
Die organisierti Fasnacht bringt e Huffe Struktur aber au Vorschrifte und Richtlinie mit sich wo do und deerte uf Wiederstand stoosse. So wärde zem Bischpiel Cortège Marschroute und -ziite pingeligg gnau vorgschriibe und yberwacht. E wittere Punggt wo allewyl fyr viel Unmuet sorgt isch die leischtigsbezoogeni Subvenzionierig, wo noneme verworrene Syschtem dr Ufftritt vonnere Grubbe an dr jewilige Fasnacht bewärtet und dämentsprächend au subvenzioniert. Ifluss hän unter anderem d' Waahl vom Sujet und d' Umsetzigg drfoo.

Fuessnoote[ändere | Quälltäxt bearbeite]

  1. Stammverein, Alti und Jungi Garde, Tambouren- und Pfyffergrubbe, Guggemuusige, Wäge, Chaisen, Grübbli und Ainzelmasgge.
  2. http://www.comite2000.ch/

Weblinks[ändere | Quälltäxt bearbeite]