Eusozialität

Dr Nacktmull (Heterocephalus glaber) – er sich ein vo de wenige eusoziale Süüger

Eusozialität (vo griech. ευ „guet“ und lat. socialis „kameradschaftlig“) isch d Bezeichnig für s Verhalte vo dr Staatebildig im Dierriich. Si isch bsunders uffellig bi de Huutflügler, z. B. bi Ameise, Honigbiine, Wäspi, chunnt aber au bi andere soziale Insekte wie de Termite, bi andere Arthropode und sogar bin e baar Garnelearte vor. Eidütig eusoziali Süüger si d Nacktmull; bi de Graumull si nid alli sicher öb si eusozial siige. Mänggisch sait mä ass au gwüssi Hünd (lat. Canidae) eusozial siige. Au wenn do kei biologischi Sterilität vo Gruppemitgliider vorlit, paare sich meistens nume d Alpha-Tier unter de Männli und Wiibli.

Für ächti Eusozialität müesse vier Bedingige erfüllt si. Das si

• e kooperativi Bruetpfläge dur mehreri Dier
• e gmeinsami Nahrigsbeschaffig und au -verdeilig
• e Deilig vom Verband in fruchtbari und unfruchtbari Dier
• s Zsämmeläbe vo mehrere Generatione

Isch nume die ersti Bedingig erfüllt, redet mä von ere quasi-soziale Art, wenn nume die letzti nit erfüllt isch, handlet es sich um e semi-soziali Art. D Übergäng chönne aber fliessend si. D Eusozialität umfasst e strängi Rangornig, wo d Ufgobe wie d Begattig, Bruetpfläg, Bau, Abwehr vo Find und Füehrig für einzelni Gruppe festschriibt.

Wil d Eusozialität e hochs Mass an Altruismus bruucht, wird in ihrem Zämmehang hüfig d Theorii vom egoistische Gen diskutiert.

Litratur

• Peter Kappeler: Verhaltensbiologie, Springer Verlag, Berlin 2006, ISBN 3-540-24056-X

Dä Artikel basiert uff ere fräie Übersetzig vu dere Version vum Artikel „Eusozialität“ vu de dütsche Wikipedia. E Liste vu de Autore un Versione isch do z finde.