Äsche

Systematik

Deilchlass:	Ächti Chnochefisch (Teleostei)
Überordnig:	Protacanthopterygii
Ordnig:	Lachsartigi (Salmoniformes)
Familie:	Lachsfisch (Salmonidae)
Gattig:	Äsche (Thymallus)
Art:	Äsche

Wüsseschaftlige Name

Thymallus thymallus

(Linnaeus, 1758)

D Äsche (Thymallus thymallus; alemanischi Näme) isch Süesswasserfisch, wo starchi Ströömig liebt. Si isch de Laitfisch vo de Äscheregion. Well si empfindli uf Wasserverschmutzig reagiert, ghört si zo de gfördete Fisch. Si reagiert aber au schlecht uf Flussverbauige, wo d Ströömig abschwächet.

Uussie

D Äsche isch e dünne längliche Fisch, wo 30 bis 70 cm lang werd und 2 kg wöge cha. Si het e silbrige Körper mit groosse Schuppe. De Rugge isch eener grau und het dunkli Tupfe wo i Raie aagornnet sind. S Muul isch eener chlii. Typisch isch di groossi faaneförmigi Ruggeflosse, wo bim Mabndli grösser isch as bim Wiibli und i de Laichzitt rötlichi Flecke uufwiise cha.

Verbraitig

De Äsche chunnt i Mitteleuropa, z England, z Skandinavie und im Baltikum voor. Si lebt i chalte, suurstoffriiche und subere Flüüssgwässer mit eme chiisige oder sandige Grund. I de Alpe chunnt si bis zonere Hööchi vo 1800 müM vor.

Lebeswiis

D Äsche lebt vo Insekte, Würmer und Schnegge, wo ufem Flussbode lebet. Ann vo de stärchste Find isch de Kormoran.

D Laichzitt goot vom Märze bis in Mai bi Wassertemperature geg 8 Grad. S Wiibli schloot inere Tüüffi vo 20 bis 40 cm mit de Schwanzflosse e Muelte in Chiisbode und lait am Nomitaag denn 600 bis 14000 Aier, interessanterwiis hüüffig wenn Vollmoo isch. Mandli wered im zwaite, d Wiibli im dritte Joor gschlechtsriiff und sind denn öppe 25 cm lang. Äsche chönd 14 Joor alt were.

Büecher

Heinz Staffelbach: Handbuch Schweizer Alpen; Bern 2008.ISBN 978-3-258-06895-4
Stefan Ineichen (Hrsg.): Stadtfaune, 600 Tierarten der Stadt Zürich; Bern 2010; ISBN 978-3-258-07561-7

Weblink

Commons: Thymallus thymallus – Sammlig vo Multimediadateie

Europäische Äsche uf Fishbase.org (englisch)

Thymallus thymallus in dr Rote Lischt vu dr gfehrdete Arten vu dr IUCN 2008. Yygstellt vu: J. Freyhof, M. Kottelat, 2008. Abgruefe am 31. Dezember 2008