Erich Schneider (Politiker, 1933)

Dr Erich Schneider (* 2. Augschte 1933 im Wyler Pritschehof, doodmool Gmai Altersberg, Oberamt Gaildorf, Wirttebärg, hite zue Gschwend; † 8. Februar 2024 z Burgstette) isch e dytsche Bolitiker (CDU) gsii.

Lääbe un Beruef

Dr Schneider isch as Suhn vun eme Buur un Holzhauer uf d Wält chuu. Är isch uf d Volks- un Fachschuel gange, wun er mit dr Fachhochschuelryfi abgschlosse het. Derno het er e Uusbildi fir dr ghobene nittächnische Verwaltigsdienscht gmacht un as Diplom-Verwaltigswirt (FH) abgschlosse. Uusbildungsstazione sin d Rothyyser z Frickenhofen un z Haubersbronn gsii, speter s Landrootsamt z Woeblena.

Anne 1956 het dr Schneider as verabeamtete Stadtinschpäkter bi dr Stadt Gaildorf aafange schaffe. Scho vier Johr speter isch er zum Burgermaischter vu dr Gmai Burgstall gwehlt wore. Au di no dr Gmaireform nei bildet Gmai Burgstette het er as Buzrgermaischter aagfiert, bis 1979.

Bartei un Ämter

In dr 1960er Johr isch dr Schneider Mitglid vu dr CDU wore. 1968 isch er as Abgordnete in Landdag vu Bade-Wirttebärg gwehlt wore. 1971 isch er au in Kraisdag vum Landkrais Baggena bzw. speter vum Rems-Murr-Krais yyzoge, wun er bis 1989 aaghert het.

Im Landdag isch er 1976 stellverdrättende Vorsitzer vu dr CDU-Frakzion wore, wu dodmol vum Erwin Teufel gfiert woren isch. Wu dr Schneider 1979 sy Burgermaischteramt ufgee ghaa het, het er si ab do ganz uf d Bolitik im Landdag kunzäntriert un isch 1982 noch em Ruggdritt vum Lothar Gaa zum Bresidänt vum Landdag gwehlt wore. In däm Amt isch er au no dr Landdagswahle 1984 un 1988 bstetigt wore. Bi dr Landdagswahl 1992 het dr Schneider uf e neii Kandidatur verzichtet un isch dodermit no dr Wahl us em Landdag uusgschide. Zue sym Noofolger isch ain vu syne baide Stellverdrätter gwehlt wore, dr Fritz Hopmeier.

Sunschtigi Ämter un Uuszaichnige

Dr Schneider isch 1992 zum ehrenamtlige Bresidänt vum Chrischtlige Jugeddorfwärch Dytschland (CJD) gwehlt wore, wu im wirttebärgische Ebersbach an der Fils sy Sitz het. Des Amt het er bis anne 2008 uusgfiert. Zue Ehre vum Schneider het s CJD 2008 dr CJD-Erich-Schneider-Bryy uusglobt. 1987 het er d Verdienschtmedaille vum Land Bade-Wirttebärg iberchuu un 1992 s Groß Bundesverdienschtchryz mit Stärn un Schulterband. Är isch au in verschidene Gremie bzw. Verain ehrenamtlig aktiv gsii. Vu 1979 bis 1983 isch er Mitglid im Rundfunkroot vum domolige Siddytsche Rundfunk gsii. Derzue isch er ab 1985 Vizebresidänt vu dr Versammlig vu dr Regione vu Europa gsii, im Stiftigsroot vum AMSEL-Ferderkrais, Grindigsmitglid vu dr Gartefrynd Burgstette un Umgäbig un im Landesvorstand vum Landesverband vu dr Gartefrynd. 2008 het er dr Hoffnigsdreger-Bryys vum Altpietistische Gmainschaftsverband kriegt. Dr Schneider isch Dreger vu dr Brenz-Medaille in Silber gsii. Är het si fir s oschtafrikanisch Land Burundi engaschiert un het dr Erich-Schneider-Stiftigsfond fir Burundi grindet.

Familie un Privatlääbe

Dr Schneider isch evangelisch gsii, ghyrote un het zwee Sihn un e Dochter ghaa.

Weblink

• Wärch vu un iber Erich Schneider in dr Dytsche Digitale Bibliothek
• dr Erich Schneider uf LEO-BW
• Erich Schneider im Munzinger-Archiv (Artikelaafang frei abruefbar)

Fueßnote

Dä Artikel basiert uff ere fräie Übersetzig vu dere Version vum Artikel „Erich_Schneider_(Politiker,_1933)“ vu de dütsche Wikipedia. E Liste vu de Autore un Versione isch do z finde.