Echo vom Tödi

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
S Echo vom Tödi
Allgmeini Informatione
Genre Volchsmusig, Ländler, experimentell
Gründig 1980
Gründungsmitglider
Kurt Albert
Chlaus Müller
Xaver Chischtler senior
Xaver Chischtler junior
Dialäkt: Glarnertüütsch

S Echo vom Tödi isch es Glarner Handorgelduett gsii.

Gschicht und Zsämmesetzig vo dr Kapälle[ändere | Quälltäxt bearbeite]

Im Jahr 1980 het de Schlosser und Handorglespiler Kurt Albert us Linthel d Kapälle gründet. Am Aafang isch de Chlaus Müller de zweit Akkordeonischt gsii. Am Klavier het si de Xaver Chischtler senior und am Bass de Xaver Chischtler junior begleitet - beed us Riichäburg.

S Echo vom Tödi het vill Personalwechsel gchaa, aber de Kurt Albert het's verstande, die Formaziuu uufrächt z erhalte. Sini erscht Eigekomposiziuu isch s' Urnerbodä Kafi gsii, und das isch ä grossen Erfolg worde. Die vier bis füüf Musikante sind i dr Schwiiz und im Ussland uufträtte und händ mit dr Zyyt au e eigeni Stiilrichtig entwigglet. I de letschte Jahr isch de Köbi Kamm us Obschtalde de zweit Handorgelespiler gsii. Am Klavier händ sich der Ernscht Ehrler us Schwyz und de Hermi Luchsiger us Schwande abgwächslet. De letscht Bassischt isch de René Walker us Friiebach gsii.

Nach Zwänzg Jaar het die Kapälle ires Abschiidskonzert ggii, und der Kurt Albert konzentriert sich hüt uf sini GmbH, e Verträtig für Hochdruggreiniger. Ab und zue spiled si aber immer nuch.

Stiil[ändere | Quälltäxt bearbeite]

S erst Ensemble het sich der Innerschwiizerstil aageignet - au mit Glarner Merggmaal. Ihri Musig het sech stilistisch markant und eigeständig enwicklet, und me het vom Echo-vom-Tödi-Stil afo rede. Das isch e Mischig us tradizioneller Ländlermusig, Volkstümlichem, Schlager, Klassik und Country. Mängmal singed d' Gschwüschter Rymann mit, oder es wird bödelet und glöffelet. Au Exotischers hai si integriert. De Köbi Kamm isch e mal z Auschtralie gsii und het deet s Instrumänt vo de Uuriiwonner, de Ditscheridu, kennä und spilä gleernt. Im Repertuaar vum Echo vom Tödi hets drum au en Didgeridoo-Schottisch ggii.