Diskussion:Osama bin Laden

Uff de änglisch Wikipedia gilt scho lang, dass wertendi Wörter wie Freiheitskämpfer oder ebe Terrorist vermyyde werde sötte, was ich eigetli guet find. Lueg en:Wikipedia:Words_to_avoid#Contentious_labels. Git's en bstimmte Grund des andersch z mache oder cha mer des ändre? --Terfili 19:57, 2. Mai 2011 (MESZ)[Antwort gee]

Doderfir chunnt im änglische Artikel zue däm Mann dr Uusdruck "terrorist" aber zimli hyfig vor. Mir isch s glych, vu mir uus chasch s umschrybe, un am beschte dr Artikel erwytere ... --Holder 20:42, 2. Mai 2011 (MESZ)[Antwort gee]

Wart lieber mit em ändere. Political correctness triibt mängisch komischi Blüete. En Artikel söll nöd wertend sii, aber ... ääh ... e dummi Froog: sind d Lemmata terrosis und fraihaitschämpfer denn öberhopt zuegloos, wenn da ase böösi Wörter sind. Oder tar mer Terrosrist zwoor bruuche, aber nume, wenn kan Mensch ase gnennt werd? --al-Qamar 21:08, 2. Mai 2011 (MESZ)[Antwort gee]

Weder Terrorist nooch Freiheitskämpfer hen e klari, mee oder minder annerkanti Definition. Es sin Schlagwörter, un sonigi hen imene Artikel numme öbis verlore, wänn gsait wird wer si bruucht. Des heisst natürli nit, dass die Begriff nit chönne in eigni Artikel sachlig dargstellt werde (zum Byspil mit de mögliche Definitione vo Terrorismus), oder dass cha gsait werde, wer öberen als Terrorist aaluegt (de un de Präsi, die Organisation, des Gericht usw.). Es git schliessli au en Artikel Sauhund, wo mer Informatione zur Etymologi un Semantik vum Wort findet, aber einewäg wird's (hoffetli) in keim Personeartikel bruucht. Usser natürli e Person isch noochwyyslig vo öberem als Sauhund bezeichnet worde, un es isch relevant gnue. In däm Fall wär's vilycht öbis anders. --Terfili 21:49, 2. Mai 2011 (MESZ)[Antwort gee]

Mengisch sind jo Freiheitskämpfer sogar Terrorischte und umgekehrt.

Bim Osama han ich jetzt aber nöd's Gfüehl, dass ma de Begriff Terrorist unbedingt muess vermiid. Öppe wo Aaschläg uf Zivilischte duet aaordne isch sicher eine. Aber grundsätzlich dät ich setigi Begriff in eme Artikel zrückhalten bruuche. -- Badener 22:02, 2. Mai 2011 (MESZ)[Antwort gee]

S git e ganz klari Definition: "Terrorischte" sin di andere, "Freihaitskämpfer" unseri. Un wämer s Kriterium mit dr "Aaschläg uf Zivilischte" nimmt, no sin alli Militär-Generäl, dytschi Vertaidigungsminischter un US-Bresidänte Terrorischte, oder halt, haan i do jetz ebis verwächslet? --Holder 05:56, 3. Mai 2011 (MESZ)[Antwort gee]

Besser cha mer's eigetli nit säge. Un wenn's d Wikipedia im 16. Joorhundert scho gee hät, no däte mer die Diskussion vilycht über de Jäcklein Rohrbach fiere. --Terfili 09:47, 3. Mai 2011 (MESZ)[Antwort gee]

Ase aifach isch da aso nöd. E Maa wo mit sinene Aahänger (Taliban) a ganzes Volk (Afghanistan) underdruckt, isch sicher kai Fraihaitschämpfer. E Mensch wo tuusigi vo Ziviliste imene Aaschlag umbringt isch kann Fraihaitschämpfer sondern ganz bistimmt und aidüttig e Terrorist. Wenns Lüüt git, wo mainet, d Taliban hebed näbis för e fraieri (arabischi) Welt tue, denn wössti nöd wa! D Taliban hend i kamm Land wo si gwörkt hend näbis biwürkt, wo em Volk z guet chääm und mee Fraiahit gääb und si hend au kai braiti Understützig i de Masse gfunde, wa Fraihaitschämpfer aber hend. D Taliban hend kai vom Volk understützti Revolution chöne uuslöse, niene, nöd z Tunesie, nöd z Libye, nöd, z Ägypte, nöd etc. Und wiso? Well si ebe nöd glaubhaft hend chöne mache, as si för e fraieri und besseri Welt chämpfet. Si hend kai Aastalte gmacht, s saudische Königshuus z stürze, kai Astalte de syrisch, ägyptisch, libysch Präsident z stürze, sondern e paar Hochhüser und und e paar dekadenti Turis i d Luft gjagt. Mit Fraihait het da aso wüürkli gäär nünt z tue, aber aidüttig mit Terrorismus und d Afghaane hend vill länger und mee under dem Terrorismus glitte as de Weste - muesch nu hiifaare und d Mensche dai go frööge. Die Uusaag mit em Militär isch o mee stammtischmäässig und wenig reflektiert. Grundsätzlich isch e Terrorist e Aaghöörige vonere Nödregirigsorganisation. Diktatore, Militär und anderi wenig unfründlichi Gstalte us de Politik agieret ebe usere andere Warte use as Fraihaitschämpfer und asigi wo vorgend weli z sii. As d Grenze zwösched Fraihaitschämpfer und Terroriste ales ander as scharf sind isch klaar, au de Gandhi und de Mandela sind vo de Machthaber igsperrt wore - aber, baid hend so wiit as mögli uf Gwalt verzichtet, und baid hend im End nebis biwürkt wo Milioone vo Mensche z guet choo isch. Hüüffig entschaidet sich d Froog Terrorist oder Fraihaitschämpfer ebe erst spoot oder sogäär erst nochem Tod. --al-Qamar 13:52, 3. Mai 2011 (MESZ)[Antwort gee]

Bim Osama un de Taliban mag's e eidütige un unumstrittene Fall sy, aber bi de ETA, de IRA oder de FARC isch's deno scho weniger klar, un die Tamil Tigers oder d UÇK sin gueti Byspil, wo für ei Syte als Befreiigskämpfer un Helde, un für di andre Terroriste un Kriminelle sin, un wo sich d Yyschätzig au je nooch däm mehrmool gänderet het un duet. De Adem Jashari isch für d Serbe en Mörder un Kriminelle, für d Albaner dergege e Volchsheld, un z Prishtina chasch aa jedem Kiosk Postcharte un T-Shirts mit em druff, un CDs mit Lieder über en chaufe. Gnauso chasch übrigens wohl z Pakistan kitschigs Glumb mitem Osame druff chaufe. Un es wird z Südafrika nit schwierig sy, Lüt z finde wo de Mandela hüt no für e Terrorist un Mörder halte. Objektivi Kriterie git's eifach nit, wäge däm sött klar gsait werde, vo wäm un was de Maa als Terrorist yygschätzt wird. --Terfili 14:39, 3. Mai 2011 (MESZ)[Antwort gee]

Au bi dr Taliban un al Qaida isch des nit eso aifach, frog emol d Aahänger vu däne, wie si des sään. Im Ibrige kämpft nit jede, wu Freihaitskämpfer gnännt wird, fir des, was mir im Weschte unter Freihait versteen. Un mit däm Stammdischspruch hann i welle saage, ass es Umbringe vu Zivilischte kai Elaistelligsmerkmol vun eme Terrorischt isch. --Holder 14:53, 3. Mai 2011 (MESZ)[Antwort gee]

Jo, d Abgrenzig isch bi de maiste nöd gaz chlaar. Und natüürli müend imene Artikel verschidnigi Mainige driistoo. Aber gell, jede Politiker und jede Mensch, wo i de Öffetlichkait stoot, het Fään und Fiind, egal wie vill de Mensch umbringe loot odr wie schlecht er singe cha. Bim Ändere vom Artikel - prinzipiell hani nünt degege - sött me aifach uufpasse, as mer nöd öber d Sträng use haut und allzu "politisch korrekt" werd, wa ebe maist politisch gär nöd korrekt isch, sondern bald emole under Augewüscherai fallt. Zodem denki, as di alemanischi Wikipedia selbstverständlich e mitteleuropäischi Sichtwiis tar zom Uusdruck bringe. Mer sind kai Amerikaner und kai Araber und üses Bild vo Fraihait und Terrorismus isch sicher andersch. Nume lieb öber en Schriibe, wels e paar Araber ase wönd oder nume böös öber en schriibe, wells e paar Amis ase wönd, bringt nünt. Au wen bi üüs di politischie Mainige wiit usenand gönd, denki ass d Amerikaner e extreemers Bild vo "Terrorist" hend, as e Schwiizer oder e Tütsche. --al-Qamar 16:38, 3. Mai 2011 (MESZ)[Antwort gee]

Es goot jo au gar nit drum ussezfinde un z diskutiere, ob öber guet oder bös oder sunscht öbis isch, egal ob jetz de Osama, de Räuber Hotzenplotz oder sunscht öber. Des isch nit üsri Uffgab. Es goot einzig drum d Yyschätzig vunere Person im öffentliche Diskurs darzstelle. Des het nüüt mit politischer Korrektheit z due, des het demit z due, dass Ussage, wo nit offesichtlig sin, in de Wikipedia im Regelfall sötte öberem zuegschrybe werde. --Terfili 19:43, 3. Mai 2011 (MESZ)[Antwort gee]

Extärni Link gänderet

Sali Mitautore,

Ich haa 2 extärni Link uf Osama bin Laden gänderet. Nämen ich bittschen e Momänt un luege no mym Edit. Wänn Ihr Froge hän, oder wänn dr Bot d Link oder di ganz Syte soll ignoriere, gehen bitte uf die FaQ-Syte fir mee Infiormatione. Ich haa die Änderige gmacht:

Wänn Ihr fertig sin mit em dureluege vu myne Änderige, chennen er no dr Aawysige in dr Vorlag unte no Fähler flicke.

Cheers.—InternetArchiveBot (Fehler melden) 12:23, 9. Sep. 2017 (MESZ)[Antwort gee]

Extärni Link gänderet

Sali Mitautore,

Ich haa 1 extärni Link uf Osama bin Laden gänderet. Nämen ich bittschen e Momänt un luege no mym Edit. Wänn Ihr Froge hän, oder wänn dr Bot d Link oder di ganz Syte soll ignoriere, gehen bitte uf die FaQ-Syte fir mee Infiormatione. Ich haa die Änderige gmacht:

s Archiv https://web.archive.org/web/20070929083730/http://www.weltwoche.ch/artikel/?AssetID=6619&CategoryID=60 in http://www.weltwoche.ch/artikel/?AssetID=6619&CategoryID=60 yygfiegt

Wänn Ihr fertig sin mit em dureluege vu myne Änderige, chennen er no dr Aawysige in dr Vorlag unte no Fähler flicke.

Cheers.—InternetArchiveBot (Fehler melden) 05:47, 4. Feb. 2018 (MEZ)[Antwort gee]