Diskussion:Alemannischer Satzbau

Dä Artikel beschrybt ke Bsunderheite vom alemannische Satzbou

Dä Artikel beschrybt ke Bsundrheite vom alemannische Satzbou, wil die Variantene, wo hie als alemannisch gäge di standarddütschen ufgfüert sy, sy alli uf standarddütsche genauso guet müglech, u meischtens o umgekehrt. Hypotaxe, also e verschachtlete Satzbou, isch nid der Underschid zwüschem Alemannischen und der Standardsprach, sondern der Underschid zwüsche höchem u tieffem Stil. Ds Alemannische wird meischtens uf ere tieffe Stiläbeni bbruucht, nämlech als alltäglechi Umgangssprach. Drum zeigt's typischi Merkmal vom tieffe Stil, wo genau glych o als Merkmal vom tieffe Stil ir Standardsprach vorchöme. Es Alemannisch imne höche Stil cha o gschrubt derhärcho mit vilnen undergordnete Sätz, nume chunt das halt sälte vor.

Was i aber i däm Artikel vermisse, sy alemannischi Bsunderheite wi d Reduplikation vo la ga cho afa oder d Variabilität ir Reiefolg vo Verbgruppe, wi si i gwüssen alemannische Dialäkt cha vorcho/vorcho cha. -- j. 'mach' wust ☛ ☏ 22:43, 16. Apr. 2007 (CEST)

Bevor i is Bett gange, tueni no d Zitig lese isch en typisch alemannische Satz, wo im Hochdütsche blöd töne wör: "Bevor ich ins Bett gehe, tue ich noch Zeitung lesen."

D Gaisteswösseschafte sind recht beliebt, aber i de Naturwüsseschafte hend s Problem mitem Nochwuchs.

Me cha aso würkli dröber strite, wan en guete alemannische Satz isch. Do gits sicher grossi Unterschid vo Sprecher zu Sprecher (und möglicherwiis au vo Regio zu Regio) und isch tatsächli e Froog vom Stil. Aber asmer im Alemannische nöd so schöö toll verschachtele cha, wie im Hochdütsche, da isch natürli scho e Tatsach, wo mer nöd abstrite cha und wo au behandlet werde sött inere Grammatik, wo usfüerli si will, demit si en Leser, wo interessiert isch, au öber ales wo wichtig isch informiere tuet, so wie de Soundso is sim Buech, wo laider vergriffe isch, betont, demot jo niemert .... ––al-Qamar 14:26, 17. Apr. 2007 (CEST).

Hehe, e Super-Schachtelsatz, cool, das will i o grad versueche! :)

Das mit tue würd i aber uf Bärndütsch chuum säge; derfür dünkt's mi, je nach Stil isch es ir Standardsprach zmindscht nid unmüglech, also dernah dürchuus akzeptabel. Öb ds Alemannische würklech weniger Verschachtligsmüglechkeite zuelat, da würd i mi lieber nid wölle feschtlege, aber was allwäg scho zuetrifft, isch, das es emel nid sövel Synonyme vo de Konjunktione git, was ja e bsunderi Uszeichnig vom Standarddütschen isch, o im Verglych zu anderne Standardsprache, u gwüss e Folg vo jahrhundertelängem Überzüchte vom gschrubte Stil, wo ja so typisch isch für zwöitklassigs Dütsch. Aber das betruf ja de ehnder der Wortschatz, u nid der Satzbou. -- j. 'mach' wust ☛ ☏ 19:43, 17. Apr. 2007 (CEST)