Das Schwabemädle

Filmdate
Originaltitel	Das Schwabemädle
Produktionsland	Deitschland
Originalsprooch	Deitsch
Erschiinigsjoor	1919
Lengi	46/58 (ondrschiidliche Fassonga) Minute
Stab
Regie	Georg Jacoby Ernst Lubitsch
Dräibuech	Paul Meissner Georg Jacoby
Produktion	Paul Davidson
Bsetzig
d Ossi Oswalda als Lorle Schmied dr Carl Auen als Chrischdof Bühler, a Uhramachergsell dr Aenderly Lebius als dr Fabrikant Ferdinand Hausegger dr Fritz Achterberg als dr Fred Hausegger, sei Soh d Nellie Basch als d Hertha von Lossow dr Paul Passarge als dr Johann Schmied, a Uhramacher dr Hermann Boettcher als Kammerherr dr Albert Paul als dr Minischder

Dialäkt: Schwäbisch

Das Schwabemädle (uff Schwäbisch: S Schwôbamädle) ischt a deitsch Stummfilm-Melodram en Schwarzweiß us-em Jôhr 1919 vo de Reschisseer Georg Jacoby ond Ernst Lubitsch. S Drehbuech vorfasst hend dr Paul Meissner ond dr Georg Jacoby. D Hauptrolla werret vo dr Ossi Oswalda ond vom Carl Auen gschbiilt. Zom erschda Môl ens Kino komma isch der Film am 21. Februar 1919 en Berlin.

Handlong

Der Film schbiilt em-ma schwäbischa Dorf vom Schwarzwald. Em Uhramachergsell Chrischdof Bühler sei Herz schlegt ganz arg firs Lorle, s Dechterle vo seim Chef. Dr Fabrikant Ferdinand Hausegger woiß, was dr Chrischdof Bühler fir a tichdiger Schaffer ischt, ond wirbt an fir sei oigena Firma ab. Zwangslaifig hôt des zor Folg, dass sich selle zwoi jonge Leit nemme oft sehet. Aber viir Jôhr schbäder geit dr Chrischdof seim Herz an Ruck ond macht seim graußa Schwarm an Heiratsôtrag.

Dui Ehe vo deane zwoi – weit weg vo dr Hoimet – stôht ondr koim guada Stern. Dr Chrischdof kleddret so nôch ond nôch emmer weider d Karriereloider nauf ond vornachlässigt sei Lorle emmer meh. Schließlich fangt’r sogar noh ôô, sich zo scheema, dass’r mit-ma Weible aus so oifache Vorheltnis vorheiradet ischt. S Lorle ischt middlerweile am Vorzweifla ibr des Vorhalda vo ihrem Môô. Se packt ihre siiba Sacha zamma ond kehrt en ihr vortrauts Schwarzwaldderfle zruck. Jetzt endlich, wia-nr alloi ischt, gôht em Chrischdof a Liacht auf ond er merkt, was’r an seim Lorle hôt. Er lôôt sich vorsetza ond ibrnemmt d Leidong vo-ma Hausegger-Zweigwerk em Schwarzwald. So fendet dia zwoi jonge Leit wiider zamma. Mit sellem vorsehnlicha Schluss heert der Film auf.

Au des muaß noh gsait werra

Mit rond 1000 Meder Länge isch Das Schwabenmädle a reladiv kurzer Schbiilfilm. Dreht wôrra ischt’r Ende 1918 em Atelier vo dr Ufa-Union-Film z Berlin-Tempelhof. Noh em Dezember vo sellem Jôhr isch der Stroifa vo dr Zensur freigeba wôrra. A Bsonderheit vo deam Film isch, dass’r 175 Zwischatitl uffweist, wo durchweg uff Schwäbisch ghalda send.

Kridik

Em Fachlexikoo „Paimann’s Filmlisten“ wuud ibr dean Stroifa ausgsait, dr Stoff ond seine Darsteller wäret sehr guat ond Szenerii ausgezeichnet. Em „Lexikon des internationalen Films“ stôht nix ibr des Werk drenna.

Weblink

• Das Schwabemädle in dr Internet Movie Database
• „Das Schwabemädle“ bei „Early Cinema“ vo dr Uni Köln
• „Das Schwabemädle“ bei Filmportal.de

Oinzlne Nôchweis

Dä Artikel basiert uff ere fräie Übersetzig vu dere Version vum Artikel „Das_Schwabemädle“ vu de dütsche Wikipedia. E Liste vu de Autore un Versione isch do z finde.