Cybersquatting

Us der alemannische Wikipedia, der freie Dialäkt-Enzyklopedy

Cybersquatting (ängl. squatter = Huusbsetzer) isch e abfälligi Bezeichnig für es Regischtriere vo Internetdomains, wo dem, wo si regischtriert, eigetlich nit zuestöhn odr wo er selbr nit bruche will. Dr Cybersquatter bietet sälli Domains denn im e rechtmäßigere Intressent zue nem möglicherwis übrhöhte Pris a, en Akt, wo vo mängge als Erprässig agseh wird.

Übrsicht[ändere | Quälltäxt bearbeite]

Hüfig regischtriere Cybersquatter solchi Domains un biete si de Person odr Firma a, wo e Handelszeiche ghört, wo im Domainname enthalte isch. Für gwöhnlich verlange si e hoche Pris, wo wit übr de urschprüngliche Regischtrierigsgebühr ligt. Um Druck uf de Rächtinhaber uszüebe, vrsehn mänggi Cybersquatter d' Website untr de Domain mit negativem Inhalt übr di Person odr Firma, wo eigetlich repräsentiert wärde sott. Dodurch erhoffe sie sich, dass de Beträffendi di Domain ender chauft, au um de negative Inhalt entfärne z'chönne.

Di meischte Cybersquatter regischtriere mehreri Variante vo nere Domain, um z'verhindere, dass sälli vo de Personen odr Firme sälber regischtriert wärde. E Cybersquatter wo z. B. eWurstbrot.de regischtriert, regischtriert au eWurstbrot.com, ElektronischsWurstbrot.com, ElektronischsWurstbrot.net un witeri logischi Variante, wo sich ableite löhn.

E Abart vom Cybersquatting isch es sognannti Typosquatting, also es Regischtriere vo Tippfehler-Domains.

Di Bezeichnig Cybersquatter wird deilwis fälschlich au für Persone verwändet, wo e großi Azahl vo Domains ohni schpeziells Interässi regischtriere odr generäll für alli Persone, wo interessiert sin, Domains z'verchaufe.

Noch ere Umfrog [1] vo dr Europäischi Kommission sin guet e Viertel vo dr Befrogte scho als Marke- un/odr Domaininhaber vo Cybersquatting betroffe gsi.

Rechtlichi Lösige[ändere | Quälltäxt bearbeite]

Schtritigkeite um Domains ußerhalb vo Deutschland wärde für gwöhnlich übr d' Uniform Domain Name Resolution Policy (UDRP) beiglegt, eme Verfahre, wo vo dr Internet Corporation for Assigned Names and Numbers (ICANN) verfasst worde isch. Kritiker bemängle abr, dass dodrbi großi Firme bevorzuegt wärde un di troffene Entscheidige hüfig wit übr d'Regle un d'Absicht vo dr UDRP usegöhn.

Grichtsverfahre sin e anderi Möglichkeit um Fälle vo Cybersquatting z'chläre, abr d'Rächtsprechig isch oft e Problem, will unterschidlichi Gricht jewils feschtglegt hen, dass de Ort vom Verfahre entwäder durch de Kläger, de Aklagti odr em Schtandort vom Server isch, wo d Domain druf regischtriert ischt, feschtglegt wird. Di meischte Lüt entscheide sich für e Beilegig im UDRP-Verfahren, will säll im Schnitt billiger un für gewöhnlich vil schnäller wie ne Klag isch. Allerdings cha, was au hüfiger vorchunnt, e Gricht übr d'UDRP hinweg de Fall entscheide.

E baar Länder hän schpezielli Gsetz in Bezug uf Cybersquatting, wo übr di normale Gsetze zuem Schutz vo Handelszeichen usegöhn. D'USA z. B. het 1999 de U.S. Anticybersquatting Consumer Protection Act (ACPA) igfuehrt.

D' Weltorganisation für geischtigs Eigetum (WIPO) het aber scho 2001 in ere Schtudie di gsetzliche Rahmebedingigen kritisiert. Es sig nit möglich, bi de herrschendi Gsetzeslag de Cybersquatter wirksam 's Handwärk z' lege. Sie schlat vor, e international gültigi, einheitlichi Regelig z'schaffe.

Noch dr UDRP chönne erfolgrichi Beschwärdeschteller d Domains lösche loh (was oft bedütet, dass öbber anderscht si widr regischtriert) odr si uf ihre Name übertrage loh (was bedütet, dass sie jährlichi Gebühre zahle müen, um z' verhindere, dass d Domain widr zuem Regischtriere freigeh wird). Nach em ACPA könne Cybersquatter für Ruef- un Gschäftsschädigung bis zue $100.000 haftbar gmacht wärde.

Es het au scho mehreri Fäll geh, wo Firme, Einzelpersone odr Regierige versuecht hen, Domainname mit de Hilf vo falsche Aschuldigunge vo Markeverletzig ihrem Bsitzer wegzneh. Deilwis sin sälli Verfahre sogar erfolgrich gsi. Sälli Praxis wird au reverse cybersquatting gnennt.

Lueg au[ändere | Quälltäxt bearbeite]

Weblink[ändere | Quälltäxt bearbeite]