Creole Jazz Band

Us der alemannische Wikipedia, der freie Dialäkt-Enzyklopedy
Dr Bändliider King Oliver.

D Creole Jazz Band isch e Dschääsbänd gsi, wo vom King Oliver gläitet worden isch und 1923 Studioufnaame gmacht het, wo sä zu äinere vo de iiflussriichste Bänd im Dschääs gmacht häi.

1922 häi dr Oliver und his Bänd z Chicago im Royal Gardens Nachtklub afo ufdräte, wo spööter dr Naame Lincoln Gardens überchoo het. Dr Oliver isch am Kornett gsi, si Schüeler Louis Armstrong am zwäite Kornett, dr Baby Dodds am Schlaagzüüg, dr Johnny Dodds an dr Klarinette, d Lil Hardin, wo spööter dr Armstrong ghürootet het, am Klavier, dr Honoré Dutrey an dr Posuune und dr William Manuel Johnson am Bass.

D Bänd het zwüschen em April und em Dezämber 1923 37 Ufnaame für d Leibel Gennett, Okeh, Columbia und Paramount gmacht. D Blatte si akustisch ufgnoo worde und die äinzelne Instrumänt si seer unusgwooge: Vilmol ghöört mä d Klarinette und d Posuune z stark, was denn uf Chöste vo de bäide Kornett goot. D Ufnaame dokumentiere aber s äinzigartige Kollektivspiil vo dr Creole Jazz Band und die zwäistimmige Breaks vom Oliver und Armstrong, wo legendär worde si. Vili dängge, ass es sich um Kollektivimprowisazione handlet, aber es si doch eender Rutiine, wo im Lauf vo dr Zit usgarbäitet worde si.[1] Dr Oliver ghöört mä bi de Ufnaame nume sälte as Solist, aber mänggisch stoot si Solo in dr beste New Orleans-Dradizion vom Kollektiv uuse wie in Mabels Dream, denn wider git s Soli im bekannte Sinn, wie im Dippermouth Blues. Au dr Louis Armstrong und vor allem dr Johnny Dodds häi as Soliste gspiilt.

Legendär si die zwäistimmige Breaks vom Oliver und vom Armstrong, wo mä von ene säit, ass si zum Däil spontan uf em Bändständ entstande sige: Dr Oliver het im Armstrong wääred eme Chorus si Break liislig vorgspiilt und dr Armstrong het so e zwäiti Stimm drzue chönne improwisiere.[2]

Litratuur[ändere | Quälltäxt bearbeite]

  • Warren Dodds, Baby: The Baby Dodds Story as told to Larry Gara. Rebeats Publications, Alma 2002, ISBN 1-888408-08-1.
  • Rick Kennedy: Jelly Roll, Bix, and Hoagy. Gennett Studios and the Birth of Recorded Jazz. Indiana University Press, Bloomington 1994, ISBN 0-253-21315-0.

Fuessnoote[ändere | Quälltäxt bearbeite]

  1. Kennedy, S. 62.
  2. Dodds, S. 38.
Dä Artikel basiert uff ere fräie Übersetzig vum Artikel „Joe_King_Oliver#1923_-_Die_Creole_Jazz_Band“ vu de dütsche Wikipedia. E Liste vu de Autore un Versione isch do z finde.