Christoph Ahlhaus

Us der alemannische Wikipedia, der freie Dialäkt-Enzyklopedy
Dr Christoph un d Simone Ahlhaus

Dr Christoph Ahlhaus (* 28. Augschte 1969 z Heidelberg) isch e dytsche Bolitiker (CDU). Är isch vum 25. Augschte 2010 bis zum 7. März 2011 Erschte Burgermeischter vu dr Frejen un Hansestadt Hamburg im schwarz-griene Senat gsii.

Läbe[ändere | Quälltäxt bearbeite]

Dr Christoph Ahlhaus isch z Heidelberg ufgwagse. Vu 1988 bis 1990 het er e Uusbildig zum Bankchaufmann absolviert, derno het er ab 1990 Jura studiert an dr Universitete Heidelberg, Berlin un München. 1998 het er e drejmonetig Ergänzigsstudium im Ramme vum Rächtsreferändariat an dr Dytsche Hochschuel fir Verwaltigswisseschafte z Speyer gmacht. 1999 het er d Zuelassig as Rächtsaawalt iberchuu.

Dr Ahlhaus isch noch em Abschluss vu syym Studium Konkneipant vu dr schlagende Verbindig „Turnerschaft Ghibellinia zu Heidelberg“ im Dachverband Coburger Convent gsi.[1]

Syt Mai 2006 isch er ghyrote mit dr Simone Ahlhaus, geboreni Götz dr Leiteri fir Lizänzmarketing bim Immobilieunternämme Dahler & Company GmbH.[2][3][4]

Bolitik in dr CDU[ändere | Quälltäxt bearbeite]

Dr Christoph Ahlhaus isch syter anne 1985 Mitglid in dr CDU. Bis 2001 isch er z Heidelberg Vorsitzende viu dr CDU im Stadtbezirksverband Altstadt/Schlierbach gsi un stellverdrättende Vorsitzende vum Chreisverbands Heidelberg. Vu 2001 bis 2006 isch er Landesgschäftsfierer vu dr CDU Hamburg gsi. Vu März 2004 bis März 2006 isch er Mitglid vu dr Hamburgische Burgerschaft gsi, as Burgerschaftsmitglid isch er Mitglid gsi vum Inne- un vum Rächtsuusschuss.

Mitglid vum Hamburger Senat[ändere | Quälltäxt bearbeite]

Im April 2006 het e dr Burgermeischter Ole von Beust zum Staatsrot vu dr Beherde fir Inneres beruefe[5]. Dr Ahlhaus het am 7. Mai 2008 dr Udo Nagel abglest un isch Innesenator vu dr Frejen un Hansestadt Hamburg wore.

Kritisch sin di vum Staat zahlte Sicherigsmaßnamme fir syy Huus (Cheschte: rund 1 Mio Euro) un fir syyni Heidelberger Wohnig (rund 200.000 Euro) gsähne wore. In dr "Dienschtwagenaffäre" het er fir e brivati PKW-Nutzig mieße Noozahlige leischte.

Erschte Burgermeischter vu dr Frejen un Hansestadt Hamburg[ändere | Quälltäxt bearbeite]

Am 18. Juli 2010 het dr von Beust bekannt gee, ass er syy Amt as Erschte Burgermeischter vu dr Stadt Hamburg zum 25. Augschte 2010 abgit, go sich meh um syy Brivatläbe z sorge. Syyre Empfählig, dr Christoph Ahlhaus as syy Noofolger z nominiere, isch dr Hamburger CDU-Landesvorstand eistimmig noochuu. D Wahl vum Erschte Burgermeischter dur di schwarz-grien Senatsmehrheit isch fir di erscht Sitzig vu dr Burgerschaft no dr barlemäntarische Summerpaus am 25. Augschte 2010 feschtgsetzt wore. Dr Koalitionspartner GAL het zerscht skeptisch reagiert uf d Nominierig vum Christoph Ahlhaus. Si het dr Bolitiker, wu as konservative Hardliner bekannt isch, ufgforderet, di liberal Linie vum von Beust wyter z goh un sich an dr Koalitionsvertrag z halte. Dr Ahlhaus het sich derno eidytig hinter die Veryybarige gstellt, wu anne 2008 zwische dr CDU un dr GAL uusghandlet wore sin un het sich au bereit erklärt, ass er sich im Augschte 2010 dr griene Basis stellt.[6] Noch em Dräffe mit dr GAL-Basis am 18. Augschte sin dr Ahlhaus un au Verdrätter vu dr GAL zfride gsi un hän gsait, di schwarz-grien Koalition cha furtgsetzt wäre. Dergege hän e baar GAL-Mitglider dr Ahlhaus fir nit wehlbar erklärt, wel er z wyt rächts diej stoh.[7] Uf eme Barteidag het d GAL noch ere lange Debatte mit ere dytlige Mehrheit d Furtsetzig vu dr Koalition unter em Ahlhaus bschlosse. Di GRÜNE JUGEND Hamburg het dr Uusstiig gforderet.

Im Vorfäld vu dr blante Wahl vum Ahlhaus isch syy Mitglidschaft in dr „Turnerschaft Ghibellinia zu Heidelberg“ effetli bekannt wore. Des het bi dr GAL Erger uusglest, un wichtigi Verdrätter vu dr Bartei hän ihri Unterstitzig bi dr Wahl zum Erschte Burgermeischter in Frog gstellt. Si hän dr Ahlhaus ufgforderet, syyni Beziehige zue dr Turnerschaft ufzkläre, un hän kritisiert, in Verbindige vum Coburger Convent diej s us ihre Sicht nationalistischi un frauefyndligi Tendänze gee. Au s Aktionsbündnis gegen den Coburger Convent het derzue ne Pressemitdeilig uusegee.[8]. Dr Ahlhaus het derno erklärt, är heb scho syt Johre kei Kontakt me zue dr Heidelberger Turnerschaft. Är heb dr Vorsitzende vu dr Verbindig bätte, ihn nimi lenger as Mitglid z fiere.[1]

Bi dr Wahl vum Erschte Burgermeischter am 25. Augschte 2010 het dr Christoph Ahlhaus im erschte Wahlgang 70 Stimme iberchuu, zwoo meh wie Koalition Abgordneti het.[9]

Bruch vu dr schwarz-griene Koalition un Nejwahl vu dr Birgerschaft[ändere | Quälltäxt bearbeite]

Am 28. Novämber 2010 hän d GAL-Burgerschaftsfraktion, d GAL-Senatore un au dr Landesvorstand vu dr GAL s Änd vu dr Koalition bschlosse, dr Ahlhaus het dodruf am 29. Novämber 2010 d GAL-Senatore un Staatsret entloo.[10] Dodermit het dr Ahlhaus bis zue dr blante Nejwahl vu dr Burgerschaft am 20. Februar 2011 e CDU-Minderheitsregierig gfiert.[11] Uf eme chleine Barteidag am 7. Dezämber 2010 isch er eistimmig zum Spitzekandidat vu dr CDU fir d Wahl gchirt wore.

Bi dr Neiwahl vu dr Burgerschaft am 20. Februar 2011 het d CDU ihri Stellig as sterkschti Chraft im Barlemänt verlore un isch nume uf 21,9 Prozent vu dr Stimme chuu - des entspricht eme Verluscht vu 20,7 Brozäntpinkt. D SPD unter em Olaf Scholz het dergege mit 48,4 Brozänt vu dr Stimme di absolut Mehrhait vu dr Mandat gschafft. Mit dr Wahl vum Scholz zum neie Erschte Burgermaischte vu Hamburg am 7. März 2011 isch no nume guet sechs Monet d Amtszyt vum Christoph Ahlhaus z Änd gange.

Zum 10. Novämber 2014 het dr Ahlhaus si Burgerschaftsmandat niderglait.

Fueßnote[ändere | Quälltäxt bearbeite]

  1. 1,0 1,1 Andreas Dey: GAL stellt die Wahl von Christoph Ahlhaus infrage. In: Hamburger Abendblatt, 26. Juli 2010. Abgruefen am 28. Juli 2010.
  2. Simone Ahlhaus sorgt für Wachstum bei Dahler & Company, konstruktiv 14. Septämber 2009 (abgruefen am 4. Augschte 2010) Archivlink (Memento vom 17. Juli 2009 im Internet Archive)
  3. Dahler & Company baut auf überregionale Märkte, Die Welt vum 22. Juni 2000 (abgruefen am 4. Augschte 2010)
  4. Was bedeutet das Ergebnis des Hamburger Votums ... für Christoph Ahlhaus? Die Welt vum 20. Juli 2010 (abgruefen am 4. Augschte 2010)
  5. Lebenslauf Christoph Ahlhaus, Innensenator (Site cha nüme abgrüeft wärde; Suche im Webarchiv)[1] [2] Vorlage:Toter Link/www.hamburg.de
  6. spiegel.de
  7. spiegel.de
  8. gruene-coburg.de
  9. focus.de
  10. welt.de: Grünen-Senatoren in Hamburg entlassen (Site cha nüme abgrüeft wärde; Suche im Webarchiv)[3] [4] Vorlage:Toter Link/www.welt.de
  11. Wahltermin zur Wahl der Hamburger Bürgerschaft 2011

Weblink[ändere | Quälltäxt bearbeite]

 Commons: Christoph Ahlhaus – Sammlig vo Multimediadateie
Dä Artikel basiert uff ere fräie Übersetzig vu dere Version vum Artikel „Christoph_Ahlhaus“ vu de dütsche Wikipedia. E Liste vu de Autore un Versione isch do z finde.