Charophyta

Charophyta
Chara globularis
Systematik
Klassifikation: Läbewäse Domäne: Eukaryote (Eucaryota) ohne Rang: Archaeplastida ohne Rang: Chloroplastida ohne Rang: Charophyta
Wüsseschaftlige Name
Charophyta
Karol et al., 2001, emend. Lewis un McCourt, 2004

D Charophyta sin e Gruppe vu photosynthetisch aktive Eukaryote, also Läbewäse mit Zällchärne. Zue ihne ghere d Armlychteralge, d Pflanze, d Schmuckalge un e baar isolierti Gruppe.

Merkmol

Wänn Schwärmerzälle bildet wäre, hän si zwoo Gaißle, wu asymmetrisch inseriert sin un zwee unterschidligi Gaißelaasetz hän. An dr Gaißlebasis het s e speziälli Struktur (multi layered structure, MLS) us Aasatzstelle fir Mikrotubuli un Zytoskelett-Dail. D Plaschtide hän bigeni Thylakoid un sin vu zwoo Membranen umgee, ohni ne periplaschtidär Endoplasmatisch Reticulum. In dr Plaschtide wird Sterchi as Reservechohlehydrat gspycheret. Si hän e uffigi Mitose un persischtänti Mitose-Spindle. D Zälldailig goht iber Phycoplaschte, bi ne Dail Gruppe au iber Phragmoplaschte un e Zällplatte. Zwische Nochberzälle git s primäri Verbindige iber Plasmodesmata, wu fadefermig - verzwygt oder uuverzwygt - sin. Alli Charophyta hän e nitbewegligi vegetativi Phase. E dail Gruppe hän mehchärnigi Zälle. Sexuälli Vermehrig isch hyfig, cha aber au fähle. Di sexuälle Arte hän e haplodiplontische Generationswächsel.

D Charophyta hän Enzym, wu in dr andere Grienalge-Gruppe fähle, zem Byschpel Glykolat-Oxidase in dr Peroxisome un Cu/Zn-Superoxid-Dismutase.

Ursprung vu dr Landpflanze

D Untersuechig vu dr Proteinsequänze vu 129 Protein vu verschidene Charophyta het ergee, ass d Vorfahre vu dr Landpflanze unter dr Jochalge (Zygnematales) z sueche sin.

Syschtematik

Di arterychscht Gruppe sin d Pflanze, wu zämme mit dr Armlychteralge zue dr Streptophytina zämmegfasst wäre. Dernäbe het s no d Jochalge un d Zieralge un e baar isolierti Gattige:

• Coleochaetales
  • Chaetosphaeridium
  • Coleochaete
• Chlorokybus
• Klebsormidium
• Schmuckalge (Zygnemophyceae)
  • Jochalge (Zygnematales)
  • Zieralge (Desmidiales)
• Streptophytina
  • Armlychteralge (Charales)
  • Pflanze (Plantae)

Literatur

• Sina M. Adl, Alastair G. B. Simpson, Mark A. Farmer, Robert A. Andersen, O. Roger Anderson, John A. Barta, Samual S. Bowser, Guy Bragerolle, Robert A. Fensome, Suzanne Fredericq, Timothy Y. James, Sergei Karpov, Paul Kugrens, John Krug, Christopher E. Lane, Louise A. Lewis, Jean Lodge, Denis H. Lynn, David G. Mann, Richard M. McCourt, Leonel Mendoza, Øjvind Moestrup, Sharon E. Mozley-Standridge, Thomas A. Nerad, Carol A. Shearer, Alexey V. Smirnov, Frederick W. Spiegel, Max F. J. R. Taylor: The New Higher Level Classification of Eukaryotes with Emphasis on the Taxonomy of Protists. In: The Journal of Eukaryotic Microbiology. Band 52, Nr. 5, 2005, S. 399–451, doi:10.1111/j.1550-7408.2005.00053.x. 
• Louise A. Lewis, Richard M. McCourt: Green Algae and the origin of land plants. In: American Journal of Botany. Band 91, Nr. 10, 2004, S. 1535–1556 (Abstract und Volltext). 

Weblink

 Commons: Charophyta – Sammlig vo Multimediadateie

Dä Artikel basiert uff ere fräie Übersetzig vu dere Version vum Artikel „Charophyta“ vu de dütsche Wikipedia. E Liste vu de Autore un Versione isch do z finde.