Dr ööstriichisch Bundesroot

Dr Bundeskanzler Sebastian Kurz bi dr Regierigserkläärig 2017 im Bundesroot in dr Hoofburg

Dr Bundesroot bildet in Ööstriich näben em Nazionaalroot die zwäite Chammere vom ööstriichische Parlamänt. Er isch dr Verdrätigskörper vo de Bundesländer uf dr Eebeni vom Bund. Dr Vorsitz vom Bundesroot wird as Bundesrootsbresidänt bezäichnet, d Mitgliider häi dr Diddel Mitglied des Bundesrates, vilmol säit men e aber Bundesrat beziejiswiis Bundesrätin.

W#ge dr Sanierig vom Parlamäntsgeböid daage dr Nazionaalroot und dr Bundesroot sit em 20. Septämber 2017 in dr Wiener Hoofburg.

Ufgoobe

Dr Iifluss vom ööstriichische Bundesroot in Österreich isch in de mäiste Fäll chlii gegenüber em Nazionalroot. Sis suspensive (d. h. ufschiebende) Weto cha vom Nazionaalroot mit ere äifache Meerhäit übergange wärde. Er cha also Gsetz – bis uf e baar Usnaame – nume ufschiebe.

E Zuestimmrächt het dr Bundesroot in deene Fäll:

• Verfassigsgsetz und -bestimmige, wo d Kompetänze vo de Bundesländer iischränke: e Zwäidriddelmeerhäit und d Helfti vo de Mitgliider müesse aawääsend si, Art. 44 Abs. 2 Bundesverfassigsgsetz (B-VG)
• gsetzligi Bestimmige, wo d Rächt vom Bundesroot sälber beträffe
• Staatsverdrääg, wo Aagläägehäite vo de Bundesländer reegle: brucht e umbedingti Meerhäit, Art. 50 Abs. 4 B-VG

Verfassigsgsetz und -bestimmige, wo d Ardikel 34 oder 35 vom Bundes-Verfassigsgsetz ändere, bruche noch Art. 35 Abs. 4 B-VG au no d Meerhäit vo de Versräter vo weenigstens vier Länder im Bundesroot.

In mängge Aagläägehäite (z. B. s Überdrääge vo Ufgoobe vo dr middelbaare in die ummiddelbaari Bundesverwaltig oder en Änderig vo Landesgränze) häi d Länder au e diräkte Iifluss uf d Gsetzgääbig vom Bund.

Bi Verfassigsändrige muess au ee Volksabstimmig abghalte wärde, wenn e Driddel vo de Mitgliider vom Bundesroots das verlangt.

Noch Art. 42 Abs. 5 B-VG het dr Bundesroot kä Rächt bi Gsetz mitzwirke, wo äine vo deene Pünkt beträffe:

• D Änderig vo dr Gschäftsornig vom Nazionaalroot
• D Uflöösig vom Nazionaalroot (vorzitigi Beändigung vo dr Gsetzgääbigsperioode)
• D Finanzgsetzgääbig (was dr Bundeshushalt u. ä. aagoot)

Im Geegesatz zur Laag im dütsche Bundesroot gältet im östriichische Bundesroot s freije Mandaat: Jeedes Mitgliid vom Bundesroot cha frei abstimme, es git käi Zwang zur Blockabstimmig in Frakzioons- oder Länderblöck.