Brigitte Klinkert

Brigitte Klinkert (2018)

D Brigitte Anne Francine Klinkert (* 22. Juli 1956) isch en elsässischi Politikerin.

s Läbe und d Politik

D Klinkert chunt vo Kolmer, wo ire Grossvater, dr Joseph Rey, Bürgermeischter gsi isch. Kolmer isch d Hauptstadt vom französische Departemänt Oberelsass (Haut-Rhin). Dr Klinkert ire Vatter isch dr Jurnalischt Gérard Klinkert. Si het bis ane 1978 a dr Uni Stroossburg Rächt studiert und 1978 z Metz am Institut régional d'administration s französische Diplom in öfentlicher Verwaltung überchoo. 1992 het si d Uusbildig für die theologischi Basisseelsoorg abgschlosse. Si cha verschideni Sprooche: Französisch, Düütsch, Änglisch, Spanisch und Ungarisch. Si isch ghürootet mit em Rémy Angst.

Scho wärend em Studium het sech d Klinkert politisch engaschiert; si isch bi de Junge Chrischtlechsoziale gsi. Ane 1979 isch si Attaché bi der Präfektur vom Departemänt Underelsass (Bas-Rhin) woorde. Si isch do au politischi Mitarbeiterin vom Presidänt vom Root vom Underelsass gsi. Sid 2011 isch si wüsseschaftlichi Mitarbeiterin vom Wirtschafts-, Sozial- und Umwältroot vo dr Region Elsass gsi, sid 2012 Mitarbeiterin vom Leiter vo der elsässische Inväntarisierig vo de Dänkmööler und au vo dr Mission Erinnerig und regionali Identität i dr Regioon Alsace-Grand Est.

1983 het me d Brigitte Klinkert zur Stadtröötin vo Colmar gwäält, was si bis 2017 bliben isch. Sid 1989 isch si stellverträttendi Bürgermeischterin gsi; und ane 1994 isch si füre Kanton Kolmer-Nord – als erschti Frau – in Gäneralroot vom Departemänt Oberelsass choo. 2008 isch si d Presidäntin vo dr Kommission für Kultur im Departemänt worde. Sid 2017 isch si als Presidäntin vom Departemäntsroot vom Oberelsass eini vo de bedütendschte Verträtterinne vom Departemänt. Si isch politisch e Zyt lang bi de Republikaner gsi und ghört jetz zu dr französische Gruppe vo de Versschidene Rächte (Divers droite).

D Klinkert seit, si well sich als Departemäntsrootspresidäntin bsunders für d Arbet, für d Jugend und eifach für s Elsass ysetze. Si isch unbedingt für nes starchs, vereinigts Elsass, wo us dr bishärige Region Grand-Est usegnoo wird: «L’Alsace c’est une histoire, une géographie, une culture.» Si hätti s Projäkt vo der territorialen Einheit vom Elsass gärn wytergfüert, wo bi de Departemäntsrööt vom Ober- und vom Underelsass ane 2012 durechoo, aber drno i de Volksabstimmige abgläänt worden isch. Und jetz isch si für s nöie Projäkt von ere Öiropäischen Einheit Elsass, wo dr französisch Presidänt Emmanuel Macron ane 2018 ufbrocht het und wo bis ane 2021 mit emene präsidiale Dekreet sell umgsetzt sy; im französische Senat und dr Nazionalversamlig isch s Gsetz do drfüür im Juli 2019 agnoo worde.

D Brigitte Klinkert pflägt bsunders au die gueti Zämenarbet über d Landesgränze und dr Rhy mit de Behörde vom Land Baade-Württebärg. Si seit: «Je souhaite multiplier les échanges de part et d’autre du Rhin. Il faut profiter de notre situation géographique près des zones les plus prospères d’Europe, le Bade Wurtemberg et la Suisse.» Si hilft au em gmeinsame Projäkt vo den Universitäte i dr Regioon, em European Campus. Und si isch im Hochschulroot vo der Hochschuel für Musig z Fryburg.

I der Kultur het d Klinkert verschideni Funkzioone gha, öppe au die vo der Presidäntin vo der Opéra national du Rhin und als Vorsitzendi vom Uufsichtsroot vo dr Cité de l'enfance z Kolmer.

Im Militär isch si Oberscht vo der Bürgerresärve.

2009 isch d Brigitte Klinkert Ritter vo dr Eerelegion woorde, 2019 het se dr französisch Presidänt Emmanuel Macron zum Offizier vo dr Eerelegion ernännt. 2011 isch si Ritter vom Oorde vo de Künscht und vo dr Literatur Ordre des Arts et des Lettres worde, 2014 au Ritter vom Nazionale Verdienschtoorde vo Frankrych Ordre national du Mérite.

Weblink

• d Website vom Departemäntsroot vom Oberelsass