Bewässerig

Us der alemannische Wikipedia, der freie Dialäkt-Enzyklopedy
D Sahara us dr Luft: Dur e Pivot-Bewässerig mit Zentralpumpe, wo sixh dräit, entstöön kräisförmigi Aabauflechene.
Flechistauverfaare in ere Wäizekultur z Arizona.
Bauele wird berägnet
Sprinkler zum Bewässere.
Dröpflibewässerigssüsteem mit Siteschlüüch im ene Gwäggshuus.

Bewässerig isch d Versorgig vo Kulturland mit Wasser, zum s Wachstum vo Pflanze z fördere und Rääge, wo feelt, z ersetze. Drbii wird vor allem in aride Regione zwüsche de Wändikräis bewässeret, zum dr Sunneschiin und die hooche Tämprature usznütze. Aber au in humide Regione wird für Pflanze, wo vil Wasser bruche wie Riis, oder zum e jooreszitligi Drochefaase z überstoo, bewässeret.

Bewässerigsverfaare[ändere | Quälltäxt bearbeite]

Zum Bewässere wärde landwirtschaftligi Technike verwändet, wo zum Däil uralt si. In vile früeje Hochkulture, wie z Egüpte, Mesopotamie, Indie, China, Ostafrika oder im vorkolumbische Amerika, het mä mit intensive Bewässerigstechnike die landwirtschaftligi Brodukzion so fest chönne vergröössere, ass d Bevölkerig stark gwaggse isch. Es git au d Aasicht, ass d Organisazioon, wo nötig gsi isch zum d Bewässerigssüsteem ufzbaue und in Stand z halte, e dr Bildig vo organisierte gsellschaftlige Strukture e wääsentlige Impuls gee het.

E Hufe vo de Verfaare zur Oberflechibewässerig wärde sit Joorduusige braktiziert. Die mäiste vo ene häi au hüte no e groossi Bedütig, wil si chostegünstig si und ooni ufwändigi technischi Aalaage chönne bedriibe wärde. Es git verschidnigi Stau- und Riiselverfaare zum Oberglechene z bewässere, wo alli s Brobleem häi, ass vil vom Bewässerigswasser verdunstet oder versickeret und eso verloore goot.

Bi Stauverfaare wärde Ackerfurche oder blanierti bzw. umdämmti Flechene under Wasser gsetzt. D Stauverfaare ghööre zu de Verfaare in dr Bewässerigswirtschaft, wo uf dr ganze Wält am hüfigste aagwändet wärde. Technisch komplizierter si Beräägnigsverfaare, wo mä mit stazionäre oder mobile Sprüeaalaage bewässeret. Die Verfaare wärde hauptsächlig in humide Klimaberiich aagwändet.

Im Geegesatz zur Oberflechibewässerig wird bi dr Underfluerbewässerig s Wasser vo unde vom Boode us dr Pflanze zuegfüert. Wenn dr Grundwasserspiegel nid hooch gnueg isch, muess er hööcher gmacht wärde, oder mä vergrabt Wasserläitige mit Löcher und Schlitz, so dass d Wurzle ans Wasser chömme. Eso git s zwar käni Verlust wil s Wasser verdunstet, aber vil Wasser goot dur Versickerig verloore und dr Oberbode cha versalze und muess immer wider emol entwässeret wärde.

Bi de Mikrobewässerigsverfaare wird nume e chliine Däil vom Bode bewässeret, und zwar nume dört, wo d Pflanze s Wasser chönne usnütze. Es brucht im Vergliich zu Beräägnisverfaare vil weniger Wasser und cha au uf Bööde aagwändet wärde, wo nid eebe si.

Litratuur[ändere | Quälltäxt bearbeite]

  • Deutsches Institut für Normung (Hrsg.): Bewässerung, Entwässerung: Normen. DIN-Taschenbuch. 5. Auflage. Nr. 187. Beuth, Berlin / Wien / Zürich 2007, ISBN 978-3-410-16461-6.
  • Deutscher Verband für Wasserwirtschaft und Kulturbau DVWK (Hrsg.): Ecologically Sound Resources Management in Irrigation. DVWK Bulletin. Nr. 19. Hennef 1993 (dwa.de). Ecologically Sound Resources Management in Irrigation (Memento vom 22. Jänner 2007 im Internet Archive)
  • E. W. Herrmann u. a.: Beregnung. Warum? Wann? Womit? DLG e. V., Frankfurt am Main 1977.
  • Susanne Neubert, Lena Horlemann: Empfehlungen zur zukünftigen strategischen Orientierung der deutschen EZ im Wasser- und Bewässerungssektor. Schlussgutachten im Rahmen des Forschungs- und Beratungsprojekts - «Wasser und Armut» - Schlussfolgerungen für die Umsetzung des Aktionsprogramms 2015 und die Millennium Development Goals. DIE-Discussion Paper 5. Deutsches Institut für Entwicklungspolitik DIE, Bonn 2005, ISBN 978-3-88985-287-8 (PDF 1 MB). PDF 1 MB (Memento vom 31. Jänner 2012 im Internet Archive)
  • Susanne Neubert, Waltina Scheumann, Annette van Edig: Integriertes Wasserresourcenmanagement (IWRM). 1. Auflage. Nomos, Baden-Baden 2005, ISBN 978-3-8329-1111-9.
  • Bruce Withers, Stanley Vipond: Bewässerung. Parey, Hamburg / Berlin 1978, ISBN 978-3-489-71510-8 (Originaltitel: Irrigation – design and practise. Übersetzt von Kurt Lecher, Neuauflage 1993 bei Blackwell-Wissensch.-Vlg. Berlin).
  • Empfehlungen für die Planung, Installation und Instandhaltung von Bewässerungsanlagen in Vegetationsflächen, 2010, ISBN 978-3-940122-21-6; Regelwerk-Herausgeber: Forschungsgesellschaft Landschaftsentwicklung Landschaftsbau e. V. (FLL).

Weblingg[ändere | Quälltäxt bearbeite]

 Commons: Bewässerig – Sammlig vo Multimediadateie
Dä Artikel basiert uff ere fräie Übersetzig vum Artikel „Bewässerung“ vu de dütsche Wikipedia. E Liste vu de Autore un Versione isch do z finde.