Basel Institute for Immunology

47.5627257.626143

Dialäkt: Baseldütsch

S Basel Institute for Immunology (BII, au Institut für Immunologie Basel) isch äins vo de wichdigste Zentrum für d Forschig im Beriich vo dr Immunologii gsi. Es het sich an dr Gränzacherstrooss 487 z Baasel befunde.

1969 het dr Farma-Konzärn Hoffmann-La Roche e nöiartigs Forschigsbrojekt gründet. Under dr Läitig vom Niels K. Jerne isch s Instidut 1971 ufdoo worde. D Roche het em jeedes Joor 24 Millioone Dollar zur Verfüegig gstellt ooni bsundrigi Bedingige. Mee as 500 Wüsseschaftler häi am Institut gforscht, und vo deene häi 27 wichdigi Uszäichnige überchoo, drunder drei Nobelbriis für e Georges Köhler, Niels Kaj Jerne und Susumu Tonegawa.

Forschigsgrubbe

S Instidut het us öbbe fufzig Wüsseschaftler bestande, wo sich zu interaktiive Forschigsgrubbe vo de bis fümf Forscher zämmegschlosse häi und vom e technische Staab understützt worde si. Si si nume as MItgliider dituliert worde und häi Aarbetsverdrääg vo zwäi bis fümf Joor übercho, wo häi chönne ernöijeret wärde. D Laboor si uf zwäi Stöck verdäilt gsi, wo dur e Wändelstääge verbunde gsi si, und rund um e Gmäinschaftsruum glääge si. Eso si d Forschigsgrubbe in ängem Kontakt bliibe.

D Forscher si Bostdoktorante und Brofässer gsi. Si si vollkomme frei gsi iiri Forschige sälber z definiere und häi sich de normaale Kontrolle vo dr wüsseschaftlige Forschig wie s Schriibe vo Exposee und Fundraising nid müesse abgee. D Verwaltig vom Instidut isch so chli gsi wie mööglig. Es het die ganz Zit Bsüech vo berüemte Wüsseschaftler gee, wo für e Daag bis zun e baar Mööned bliibe si, was dr wüsseschaftlig Betriib beriicheret het.

D Uflöösig vom Instidut

2000 het d Roche s Instidut ufglööst und mit em Zentrum für mediziinischi Genomik, ere Abdäilig vo dr Roche, ersetzt.

Weblinks

• Seite ehemaliger Mitarbeiter (Memento vom 13. Novämber 2007 im Internet Archive)
• Book Review: The History of the Basel Institute for Immunology, Frontiers in Immunology D Rezensioon vom e nöije Buech über d Gschicht vom Instidut.
• Festschrift in honor of Ivan Lefkovits. Scandinavian Journal of Immunology 62 (Suppl. 1), 1-22, 2005---mit Erläbnis vo früenere BII MItgliider]

Fuessnoote

Dä Artikel basiert uff ere fräie Übersetzig vum Artikel „Basel_Institute_for_Immunology“ vu de änglische Wikipedia. E Liste vu de Autore un Versione isch do z finde.