Autisport

Formle 1: Dr Fernando Alonso isch mit Renault 2005 und 2006 Wältmäister worde

Dr Autisport isch e Form vom Motorsport und umfasst alli Diszipline und Wettbewärb, wo s Ziil von ene isch, ass mä mäistens vierredrigi Motorfaarzüüg so schnäll oder so gschiggt wie mööglig faart.

E groosse Däil vo de Autisport-Veraastaltige si Gschwindigkäitswettbewärb. Dene säit mä mäistens Autirenne. E Hufe von ene finde uf spezielle Motorsport-Rennstrecke statt, wo bsundrigs doodrfür baut worde si, anderi uf abgsperrte gwöönlige Stroosse (Stroosserenne). Es git au no Offroad-Renne für Gländwääge. Stroosserenne uf Stroose, wo nit abgsperrt si, si mäistens illegal und bringe anderi Vercheersdäilnäämer in Gfoor. Si wärde doorum nit zum Autisport zelt.

S erste Autirenne het am 22. Juli 1894 vo Bariis uf Rouen (126 km) stattgfunde. 102 Faarzüüg si aagmäldet gsi, drunder 39 mit Dampfaadriib, 38 mit Benzinmotor, 5 mit elektrischem Aadriib, 5 wo mit komprimierter Luft gfaare si, und äis mit eme Fääderemechanismus; 15 Auti si am Ziil aachoo. Gwunne het dr Albert Jules Groof vo Dion mit sim Dampfwaage. Die ersti „Rennformle“ mit Vorschrifte im Bezuug uf s Gwicht und d Bsetzig isch dr Gordon-Bennett-Göp gsi. 1906 isch s erste Rundstreckirenne duuregfüert worde, dr Grand-Prix vo Frankriich.

Äine vo de erste Autisportler in Dütschland isch dr Hubert von Herkomer gsi, wo 1905 s erste Zueverlässigkäitsrenne, d Herkomer-Konkurränz aagstoosse het.

Es git verschidnigi nazionali und internazionali Motorsportmäisterschafte und Serie für Auti. Zu de bekanntere ghööre d Formle 1, d IndyCar Series, d GP2-Serii und d Rallye Dakar.

Weblingg

 Commons: Autisport – Sammlig vo Multimediadateie

Fuessnoote

Dä Artikel basiert uff ere fräie Übersetzig vum Artikel „Automobilsport“ vu de dütsche Wikipedia. E Liste vu de Autore un Versione isch do z finde.