Arthur Duffner
Dr Arthur Hans Duffner (* 1869 z Furtwange; † 1934) isch e dytsche Unternämer un Haimetdichter gsii.
Lääbe
[ändere | Quälltäxt bearbeite]Dr Arthur Duffner isch e Suhn vum Karl Gustav Duffner gsii, eme Furtwanger Unternähmer, wu mit Straugflächt ghandlet het, vor allem mit Strauhiet. Är het no ne Brueder ghaa, Josef (1868-1935), wu speter Landdags- und Rychsdagsabgordnete woren isch. D Firma Jos. Duffner Söhne isch vum Großvater vum Arthur, em Joseph Benedikt, wu au Dokter gsi isch, grindet wore. Dr Vater het d Firma noch em Dod vum Großvater 1865 wytergfiert, zerscht zäme mit sym Brueder Oskar, ab 1872 derno elai.
Dr Karl Gustav Duffner isch anne 1895 gstorbe, D Firma het derno dr Arthur ibernuu. Eb sy Brueder au aafangs mitgmacht het, waißt mer nit, anne 1899 isch dr Arthur uf alli Fäll dr elainig Bsitzer. No 1900 verschwindet d Firma us dr Archivalie, wahrschyns isch si um die Zyt ufglest wore.
Iber d Gschicht vu dr badische Strauflächter het dr Duffner im Johr 1899 en Artikel in dr Furtwanger Stadtchronik publiziert. Anne 1900 het er unter em Titel „Schwarzwälder Leben“ e Band mit alemannische Gedicht uusegee. Vor allem sy Gedicht zum Hirschmendig chännt mer z Furtwange au hit no.
Dr Arthur Duffner isch im Johr 1934 gstorbe.
Wärch
[ändere | Quälltäxt bearbeite]- Die Strohindustrie im badischen Schwarzwald. Ein Ueberblick über deren Entwickelung bis auf die neueste Zeit. Dölter, Emmendingen 1899. 24 S.
- Schwarzwälder Leben. Gedichte in Schwarzwälder Mundart. Braun, Karlsruhe 1900, 64 S.
Literatur
[ändere | Quälltäxt bearbeite]- Gerd Bender: Die Strohflechterei im Raum Furtwangen. In Stadtchronik Furtwangen I, 294ff
Weblink
[ändere | Quälltäxt bearbeite]- Täxtprobe uf dr Websyte vu dr Muettersproch-Gsellschaft
- „Arthur H. Duffner“ im Stadtwiki Furtwangen, z. Zt. offline