Areopoli

Us der alemannische Wikipedia, der freie Dialäkt-Enzyklopedy
d Platia vo Areópli mitem Denkmool vom Petrobei Mavromichalis
d Cherche Taxiárchis z Areópoli

Aréopoli (noigriech. Αρεόπολη, "Stadt vom Ares"), früenner Tsímova (Τζίμοβα), isch e Stedtli uf de Mani. S litt südlich vom Hafe Liméni im Landesinnere. I de Umgebig vo Areopoli a de Chüste gitses vili Hööline, wo zom Tail i de Staizitt biwonnt wore sind.

Areopoli isch e Stedtli mit enge verwinklete Gessli. Vo de vile Cherche und Chappeli isch d Cherche Ájios Joánnis Pródroms ("Johannes de Toiffer") e Bsuech wert. Da stammt usem früene 18. Joorhundert und isch mit Freske usem Lebe vom Jesus uusgmoolet. D Cherche Taxiárchis ("Erzengel") isch ane 1798 vo de Famili Mavromichalis gstiftet wore. Uf de Platia vo Areopoli stoot e Denkmool vom Petrobei Mavromichalis.

Z Areopolis isch am 17. März 1821 di griechisch Revoluzio uusgrueffe wore. Under de Füerig vom domoolige Bey Petrobei Mavromichalis sind d Maniote uf Skardamula marschiert, wo si sich mit de Lütt vom Panagotis Troupakis, em Soo vom Michalis Troupakis troffe hend. D Maniote sind den gege Kalamata zoge und hend am 23. Märze d Stadt ignoo und Törgge vertribe. D Stadt, wo dozmool no Tsímova ghaisse hett, isch denn zu Eere vom griechische Chrieggott Ares i Areopoli umgnennt wore.