Antonio Loprieno

Dr Antonio Loprieno (* 1955 z Bari, Italie) isch en italiänisch-schwizerische Egyptolog und Universitätsprofässer.

Dr Loprieno het siis europäische Abitur (Baccalauréat Européen) im Johr 1972 an dr Europäische Schuel z Brüssel gmacht. Drnoch het er Egyptologii, Sprochwüsseschaft und Semitistik an dr Universität Turin studiert, won er 1977 promoviert het und bis zum Johr 1981 as Assistänt gschafft het. Denn isch er mit eme Stipändium vo dr Alexander-von-Humboldt-Stiftig an d Universität Göttinge gange und het sich dört im Johr 1984 habilitiert. Vo 1983 bis zum Johr 1986 isch er Dozänt an dr Universität Perugia gsi, deilwiis gliichziitig vo 1984 bis 1987 an dr Universität Göttinge.

D Universität Perugia het en 1987 zum usserplanmässige Profässer für hamito-semitischi Sprochwüsseschaft ernennt. Er het dört glehrt und gforscht, bis dass er vo 1989 bis zum Johr 2000 ordentlige Profässer für Egyptologii und Leiter vom Department for Near Eastern Languages and Cultures an dr University of California, Los Angeles, worden isch. In dere Ziit isch er au Gastprofässer an dr Hebräische Universität z Jerusalem gsi, an dr École Pratique des Hautes Études z Paris und an dr Universität Heidelberg.

Im Johr 2000 isch dr Loprieno ordentlige Profässer für Egyptologii an dr Universität Basel worde und in dere Funktion isch er Studiedekan vo dr Philosophisch-Historische Fakultät, Presidänt vo dr Planigskommission und Presidänt vo dr Bibliothekskommission gsi. Im Juli 2005 isch er für d Amtsziit 2006 bis 2010 zum Rektor vo dr Universität gwehlt worde.

Am 8. Mai 2008 het en d Rektorekonferänz vo de Schwiizer Universitäte (CRUS) zu ihrem neue Presidänt gwehlt. Am 1. August 2008 het er s Amt vo siim Vorgänger Prof. Dr. Hans Weder adrätte.

Dr Loprieno isch Mitgliid vo dr «Akademie der Wissenschaften zu Göttingen», vom Dütsche Archäologische Institut (DAI) und andere international bedütende wüsseschaftlige Gsellschafte. Er isch au Mitherusgäber vo dr «Zeitschrift für Ägyptische Sprache und Altertumskunde» (ZÄS) und Redakteur vo dr Zitschrift «Lingua Aegyptia – Journal of Egyptian Language Studies» (LingAeg).

Im Joor 2015 isch dr Antonio Loprieno as Räkter vo dr Baasler Uni zruggdrätte.

Weblingg

Dä Artikel basiert uff ere fräie Übersetzig vu dere Version vum Artikel „Antonio_Loprieno“ vu de dütsche Wikipedia. E Liste vu de Autore un Versione isch do z finde.