Alfabetisierig

As Alfabetisierig bezäichnet mä dr Brozäss, wo s Lääsechönne vermiddlet wird und mänggisch au s Schriibechönne, unabhängig drvo, öb d Schrift, wo gleert wird, en alfabetischi Schrift isch. Dr Grad vo dr Lääs- oder Schribkompetänz von ere Bevölkerig cha in Brozänt für äinzelni Bevölkerigsschichte aagee wärde und mänggisch au für historischi Epoche. D Alfabetisierig gältet as Baasisbildig.

D Alfabetisierig uf dr Wält

D Alfabetisierigsroote in alle Länder uf dr Wält

Wääred in de industrialisierte Staate d Statistike von ere Alfabetisierigsroote vo nooch zu hundert Brozänt schwätze, si in de beste Fäll woorschinlig bis zu zää Brozänt vo dr Bevölkerig dört funkzionali Analfabeete, das häisst si chönne au äifachs Gschribnigs nid richdig verstoo. Noch ere OECD-Studie (1994–1998) isch denn d Zaal vo de funkzionale Analfabete in zwäi vo drei Industriistaate hööcher as fufzää Brozänt gsi. In de USA zum Bischbil chönne mee as zwanzig Brozänt vo de Erwaggsene nit gnueg lääse, für dass si e Formular chönne usfülle, d Beschriibige uf Lääbensmiddel chönne verstoo oder eme Chind en äifachi Gschicht chönne vorlääse.

Wil e hoochi Alfabetisierigsroote mäistens in de hööcher entwigglete, riichere Länder vorchunnt, häi d Regierige vo vile Entwiggligsländer vil in d Alfabetisierig vo iirer Bevölkerig inwestiert, zum d Entwigglig vo iire Länder aazkurble. In mängge Gsellschafte aber git s soziali Hindernis. So git s Länder, wo s de Mäitli verbotte isch, in d Schuel z goo oder wo si scho noch e baar Joor müesse ufhööre z leere, in andere git s Gsellschaftsschichte wo diskriminiert wärde und für Mensche mit eme Migrazionshindergrund isch s überall schweerer, e gueti Bildig z überchoo.

Die mäiste Analfabete, mee as achthundert Millione, lääbe in Asie. In Afrika si s mee as 150 Millione und in Südamerika 25 Millione. Im Allgemäine gältet, ass dr Analfabetismus bi dr Landbevölkerig gröösser isch as bi dr Stadtbevölkerig und bi Fraue hööcher as bi Manne.

Litratuur

• Robert A. Houston: Alphabetisierung. In: Europäische Geschichte Online. uusegee vom Instidut für Öiropäischi Gschicht (Mainz), 2011, abgrüeft: 2. Februar 2012.
• K. Rothe, C. Ramsteck: Sicherheitsnetz Bildung: Defizite im Lesen, Schreiben und Rechnen zu beseitigen macht fit für den Arbeitsmarkt - ein Modellprojekt. In: PERSONAL. Zeitschrift für Human Resource Management. Heft 07-08/2010. Verlagsgruppe Handelsblatt 2010, S. 60–61.

Weblingg

• http://www.alphabetisierung.de/
• http://www.alphabetization.org/
• http://www.alphabetisierung.at/
• Alpha-Basis-Projekt Lehrbücher zur Alphabetisierung
• Arbeitskreis Orientierungs- und Bildungshilfe e. V.
• https://web.archive.org/web/20150718012302/http://www.alphabund.de/
• Alphabetisierung/Grundbildung – State of the Art, Projektverbund vom BMBF und Deutschen Institut für Erwachsenenbildung