Émile Waldteufel
| Dialäkt: Schwäbisch |
Dr Émile Waldteufel (eigentlich hot’r Charles Émile Lévy ghoißa; * 9. Dezembr 1837 z Strôßburg; † 12. Februar 1915 en Paris) ischt a elsässischr Musikr ond Kombonischt gwäa.
Aus seim Leaba
[ändere | Quälltäxt bearbeite]Dr Émile Waldteufel ischt am 9. Dezembr 1837 z Strôßburg uf d Welt komma. Sei Vaddr isch dr Lazare Lévy gwäa, wo sich selbr Louis Waldteufel ghoißa hot. D Muadr vom Émile, d Flora Neubauer, ischt Pianischdin ond Professr fir Gsang gwäa. Wia dr Jong fenf Johr alt gwäa ischt, isch’r mit seine Eltra ond seim Bruadr Isaak vo Stroßburg noch Paris omzoga. Da erschda musikalischa Ondrricht hot’r vo seira Muadr griagt. Schbätr isch dr Heyberger sei Lehrer worra.
Am Konservadoriom en Paris hot dr Waldteufel Musig studiirt. Wia-nr dô drmit fertig gwäa ischt, hot’r zerscht a Weile en-ra Klaviirfabrik gschafft. Schbätr isch’r am Hof vom Napoléon III. Vorschbiilr vo deam seim Weib, dr Kaisore Eugénie, ond 1865 kaisrlichr Hofballdirektr worra. E dera Funktioo hot’r d Bäll a dr Parisr Opéra dirigiirt.[1] Dr Waldteufel hot meh wia 250 Denz komboniirt, hauptsächlich Walzer. Sei bekanndeschtr vo deane isch dr Schlittschuhläufer-Walzer (Les Patineurs, op. 183) aus em Johr 1882 worra. Seine Walzr hend sich am Stil vom Johann Strauss oriendiirt, abr dui graußa melodischa Begabong vo seim Vorbild ond deam sein Diafsenn hot’r bei Weidem et erreicht.[2] Am 12. Februar 1915 hot dr Waldteufel in Paris em Altr vo 77 Johr s Zeitliche gsegnet. Sei letzschda Ruha hot’r uf em Pariser Friidhof Père Lachaise gfonda.[3]
Schlagr
[ändere | Quälltäxt bearbeite]En de Sibzgrjohr vom 20. Johrhondert hot’s dr Émile Waldteufel gschafft, mit moderne Bearbeidonga vo zwoi vo seine Kombosiziona – gsonga vom Schlagrduo Cindy ond Bert – vordre Plätz en de deitsche Hitparada zo belega: D Melodii vom Liad Wenn die Rosen erblühen in Malaga ischt dupfagleich wia em Waldteufel sei España, op. 236, wo abr wiidrom a Bearbeidong vo dr gleichnamigea Rhapsodie vom Emmanuel Chabrier ischt. S zwoide Liad vo deam Schlagrduo, Spaniens Gitarren, basiirt uf em Walzr Estudiantina, op. 191. Dr deitsch Schlagrkombonischt Heinz Gietz hot dia Vorlaga bloß so vorändret, dass’r aus-em Dreivirtl-Takt an Viirvirtl-Takt gmacht hot.
Bsondre Nochweis
[ändere | Quälltäxt bearbeite]- ↑ Der Musik Brockhaus, Wiesbaden: Brockhaus; Mainz: Schott (1982), S. 656, ISBN 3-7653-0338-0
- ↑ Friedrich Herzfeld: Das Lexikon der Musik, Verlag Ullstein GmbH, Frankfurt am Main – Berlin – Wien (1976), S. 599
- ↑ Archivierte Kopie. Archiviert vom Original am 29. April 2010; abgruefen am 25. Mai 2010.
Weblink
[ändere | Quälltäxt bearbeite]- Gmeinfreji Note vu Émile Waldteufel im International Music Score Library Project
- A ausfihrlichora Biografii mit weitre Kombosiziona bei planet-vienna
- CD-Tipps bei amazon.de
- Heerprob vom Walzr España
|
Dä Artikel basiert uff ere fräie Übersetzig vu dere Version vum Artikel „Émile_Waldteufel“ vu de dütsche Wikipedia. E Liste vu de Autore un Versione isch do z finde. |