Venus von Milo

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Venus de Milo Louvre Ma399-02b.jpg
Venus de Milo Louvre Ma399-06a.jpg
D Venus vo Milo, vo vorne und vo hinde

D „Venus vo Milo“ isch näbe dr Laokoon-Grubbe und dr Nike vo Samothrake äins vo de bekanntiste Bischbil vo dr hellenistische Kunst.

Si isch woorschiinlig um 100 v. Chr. entstande und isch am 8. April 1820 vom Buur Georgios Kentrotas uf dr Kykladeinsle Milos in dr Umgääbig vo dr Ruine vom ene griechische Theater entdeckt worde. Er het Stäi as Baumaterial gsuecht und won er bearbäitete Marmor und d Statue entdeckt het, het er s e baar Franzoose gsäit, wo antiki Sache gsuecht häi. Dr Buur het nid begriffe, wie wichdig si Fund gsi isch und isch mit e baar Gäldstück zfriide gsi, won em d Franzoose gee häi.

Dr Marquis de Riviere het Kontakt ghaa und het s fertig brocht, d Statue für Frankriich z „chaufe“. Noch eme Duurenander hätt d Statue zerst uf Konstantinopel sötte gschickt wärde, aber d Franzoose häi das rächtzitig chönne verhindere. Dr Marquis het d Venus denn im franzöösische Köönig Ludwig XVIII. gschänkt. Dä het sä im Louvre z Bariis gee, und dört isch d Statue hüte no.

D Skulptuur isch us Marmor us de Stäibrüch uf dr Kykladeinsle Paros gmacht und sümbolisiert s Ideal vo dr wiiblige Schöönhäit. Dorum het men ere dr Naame vo dr römische Göttin Venus gee. Wil d Venus äigentlig die römischi Entsprächig vo dr griechische Afrodite isch, säit mä dr Statue au „Afrodite vo Melos (Milos)“. Aber es isch nit mee as e Vermuetig, ass es sich um e Darstellig von ere Göttin oder ere andere müthologische Figur handlet.

Weblingg[ändere | Quälltäxt bearbeite]

 Allmänd (Commons): Venus von Milo – Sammlig vo witere Multimediadateie