Tal der Könige

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Daal vo de König

S Daal vo de König (Arabisch: وادي الملوك Wadi Biban el-Muluk) isch es Daal im Süde vo Ägypte uf em Weschtufer vom Nil.

Während em ägyptische Neue Riich vom 16. Johrhundert BCE bis zum 11. Johrhundert BCE isch dört d Nekropole vo Thebe gsi, und d König und Adligi hai sich dört in Gräber lo begrabe, wo us em Felse vom Bärg uusegmeisslet worde sii. [1] Dr erscht König wo do sis Grab het lo baue isch dr Thutmosis I. gsi, dr letscht isch dr Ramses XI, wo sis Grab aber denn nit bruucht het.

Die meischte Greber si scho im Alterdum uusgraubt worde. Wäge däm het me in dr Dritte Zwüscheziit under em Scheschonq I. Mumie us de meischte Greber usegno und si in Sammelgreber widr begrabe, im allgemeine ohni ihre Schmuck.

Dr berüehmtischd Fund im Daal vo de König isch im änglische Ägyptolog Howard Carter (1874 – 1939) glunge, won er 1922 s Grab vom Pharaoh Tutanchamun gfunde het.[2]

Zue de unterirdische Greber ghöre au überirdischi Dotetämpel, wom enä Hüüser vo Millione vo Johr gsait het, und wo mä am Fuess vo de Bärg baut het. Ä baar vo de wichtigere si d Tämpel vo dr Hatschepsut, vom Amenhotep III., vom Ramses II. und vom Ramses III.

Quelle[ändere | Quälltäxt bearbeite]

  1. Theban Mapping Project. Abgrüeft am 4. Dezember 2006.
  2. Detlef Wienecke-Janz, Ute Becker, Johannes Ebert, Die Chronik. Geschichte des 20. Jahrhunderts bis heute, Chronik Verlag 2006, S.182