Singani

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Singani-Flasche

Singani isch e höchprozäntige Wybrand, wo us dr Räbsorte Muscat d'Alexandrie gwunne wird. Är giut aus Nationauschnaps vo Bolivie und wird houptsächlech i de tranditionelle Wybouregione, in Tarija, härgschteut. Singani isch Beschtandteu vo viune traditionelle bolivianische Cocktails wie em Chuflay und dem Yungueñito.

Urschprung[ändere | Quälltäxt bearbeite]

Während dr Koloniauzyt und im Zug vor Expansion vor Siubergwinnig i de Mine vom Cerro Rico in Potosi, hei d'Spanier mit dr kultivierig vo Räbe i de Täler südlech vo Potosi aagfange. D'Härschtelig vo Wy het sech wäge de geografische und klimatische Bedingige aus sehr schwirig erwyse. Drum het me d'Deschtilation vom Wy bevorzugt. Die so härgschteuti Spirituose isch ungerem Name Singani bekannt worde.

Härschtelig[ändere | Quälltäxt bearbeite]

Usgangsmateriau füre Singani si d'Trube vor Räbsorte Muscat d'Alexandrie. Nachem presse wir dr Moscht ohni Maische zwüsche 5 u 21 Tag i Stautanks vergore. D'Destillation erfougt im Alambic, wo dr Wy i eim oder zwee Durchgäng uf 71° deschtilliert wird. Mit Ande-Queuwasser wird er nächär uf Trinkschterchi abegsetzt und ryft es paar Monet i Stautanks, bevor er id Fläsche abgfüut wird.

Kontrollierti Urschprungsbezeichnig[ändere | Quälltäxt bearbeite]

Singani isch e kontrollierti Urschprungsbezeichnig, wo d'Spirituose, gwunne us Muscat d'Alexandrie u härgschteut imene bestimmte bolivianische Gebiet, beschrybt. Ds Gsetz Nr,. 1334 vom 4. Mai 1992 über die kontrollierti Härkunftsbezeichnig definiet Singani aus "Spirituose, gwunne us dr Deschtilation vo natürlechem Wy us früsche Trube, härgschteut und abgfüut y de Urschprungsorte.

Ds glyche Gsetz definiert, dass di kontrollierte Urschprungsbezeichnig Singani reserviert isch für Spirituose, wo produziert wärde im Zentrautau vom Departamänt Tarija, de Täler vo de Provinze Nord u Süd Cinti u Tomina im Departamänt Chuquisaca, Sahapaqui, Luribay und d'Provinze Loayza und Murillo im Departamänt La Paz, d'Täler vo Turuchiupa, Cotagaita, Vicchoca, Tumusla, Poco Poco, Tirquibuco und Oroncota vo de Provinze Nord u Süd Chichas, Cornelio Saavedra u Linares vom Departamänt Potosi u angerne bolivianische Produktiosnzone wo zuekünftig no chöi feschtgleit wärde.

Arte vo Singani[ändere | Quälltäxt bearbeite]

Es git 3 zugelasseni Arte vo Singani:

Gran Singani / Singani de Altura[ändere | Quälltäxt bearbeite]

Isch ds Produkt, gwunne us dr eifache oder dopplete Deschtilation vo vergorene Wyne us dr Trube Muscat d'Alexandrie, gläse ire Höchi vo mindeschtens 1'600 M.ü.M., härgschteut, deschtiliert, abgfüut und gryft y de Zone mit kontrollierter Urschprungsbezeichnig.

Singani erschter Wau[ändere | Quälltäxt bearbeite]

Isch ds Produkt, gwunne us dr Deschtilation vo eire oder mehrerne vergorene wysse Sorte Vitis Vinifera, härgschteut, deschtiliert, abgfüut und gryft y de Zone mit kontrollierter Urschprungsbezeichnig.

Singani zwöiter Wau[ändere | Quälltäxt bearbeite]

Isch ds Produkt, gwunne us Treschter vo eire oder mehrerne Sorte Vitis Vinifera, härgschteut, deschtiliert, abgfüut und gryft y de Zone mit kontrollierter Urschprungsbezeichnig.

Bibliografie[ändere | Quälltäxt bearbeite]

  • Austral Spectator, Apuntes sobre Grapas, Piscos y Singanis, Ediciones Granica S.A., coll. Viñas, Bodegas & Vinos de América del Sur 2004 ISBN: 9872091412

Weblinks[ändere | Quälltäxt bearbeite]

Dä Artikel basiert uff ere fräie Übersetzig vu dere Version vum Artikel „Singani“ vu de spanischee Wikipedia.

E Liste vu de Autore un Versione isch do z finde.