Seene

Us der alemannische Wikipedia, der freie Dialäkt-Enzyklopedy

E Seene (Tendo) verbindet e Muskel miteme Chnoche.

Anatomii und Funktion[ändere | Quälltäxt bearbeite]

D Muskle sind nöd direkt am Skelett agmacht, sonder mit de Chnöche dör Seene verbunde. Wääred bi de Finger und Zeche d Seene recht lang und schmaal sind, sind d Seene vom Brust- oder Gsässmuskel zimli chorz. Eri Funktion isch d Öberträgig vo de Chräft zwöschet de Muskle und em Skelett. Seene sind liecht deenbaar, demit d Chräft vom Muskel nöd direkt uf de unelastischi Chnoche öbertrait werd. Di stärchsti Seene isch d Achillesseene (Tendo calcaneus), wo de Wademuskel verbindet, und cha bis zonere Tone Zugchraft uushalte!

Seeneriss[ändere | Quälltäxt bearbeite]

E Seeneriss chunnt fast nume bi Seene vor, wo dör ständigi falschi Belastig eri Elastizität verlore hend und brüchig wore sind. De Prozess zücht sich öber Joore hii und d Seene cha denn au binere aifache Biwegig plötzli riisse. E Seeneriss cha operativ bihandlet were. Er macht sich bimerkbar, indem de Muskel, wo zu de grissne Seene ghört, nüme biwegt were cha und natürli dör starchi Schmerze.