Romulus und Remus

Us der alemannische Wikipedia, der freie Dialäkt-Enzyklopedy
Hops zue: Navigation, Suech
di kapitolinischi Wölfi mit em Romulus und em Remus

De Romulus isch de sagehafti Gründer und de erst König (753-716) vo Rom gsii. Er und sin Zwillingsbrüeder Remus sind d Söö vom Chriegsgott Mars und vo de Vestalin Rea Silvia und si sind von ere Wölfi uufzoge wore.

Giburt[ändere | Quälltäxt bearbeite]

Noch de römische Saag isch d Rea Silvia d Töchter vom Numitor, em König vo Alba Longa gsii. De isch vo sim Brüeder Amulius vertribe wore. Well de Angst gha het, de Soo vo de Rea Silvia chönnt sich anem rääche, het er si zonere Priesteri vo de Göttin Vesta gmacht, wo nochem Gsetz jungfröilich bliibe müend. De Chriegsgott Mars het sich aber ere gnöcheret und si gschwängeret. Drufabe het si Zwiling uf d Welt broocht, wo uusgsetzt wore sind.

Juged[ändere | Quälltäxt bearbeite]

di kapitolinischi Wölfi mit em Romulus und em Remus (Einstellungsgröße)

E Wölfi het di beede Buebe agnoo und uufzoge, bis si de Hirt Faustulus gfunde het. Zäme mit sinere Frau Acca Laurentia het er denn di beede uufzoge. Nochdem si erfaare hend, wer eri Muetter isch, hend si sich am Amulius grächt und bischlosse e Stadt z gründe.

Stadtgründig[ändere | Quälltäxt bearbeite]

De Romulus het em 21. Aprile 753 v.Chr. miteme Pflueg ufem Palatin d Grundriss vo de noie Stadt zoge und e Mürli baut. De Remus isch aber us Spaass dröber gumpet, wa aber e Frevel gsii isch, werum de Romulus sin Brüeder erschlage het. D Stadt, wo de Name Roma öbercho het, isch schnell aagwachse, het aber fast kai Fraue ghaa. D Römer hend di binochburte Sabiner öberlistet und a dene d Fraue graubt. Drufabe isches zum Champf choo, aber d Fraue hend nöd wöle as eri Mane eri Brüedere und Vättere tötet und umgcheert und sind zwösched baid Heer gfaare. De sabinisch König Titus Tatius isch zum Mitregent vo Rom wore und di sabinischi Sidlig ufem Quirinal isch i di jungo Stadt iglideret wore.

Organisation vo de Römer[ändere | Quälltäxt bearbeite]

De Romulus het d Römer i drai Stämm (tribus) iitailt, i d Ramnes, d Tities und d Luceres und er het au de Senat iigrichtet. Denebet het er de Kult vom Jupiter Stator und Hercules iigrichtet und för sin Brüeder Remus s Fest Lemuria. Er het au d Priesterschaft vo de Arvales fratres initiiert.

De Romulus het ufem Palatin gwonet, sini Frau isch d Sabineri Hersilia gsii. Sii Stellvertretter (praefectus urbis) isch de Denter Romilius gsii.

Tod[ändere | Quälltäxt bearbeite]

Bimene Gwitter isch de Romulus zunderainisch verschwunde. Drufabe isch s Grücht umegange, d Senatore hebid en ermordet und verstücklet. Aber do isch em Iulius Proculus de Romulus as Gott Quirinus erschine und het em gsait, as er in Himmel entrückt wore sai und zomene Gott woren isch. D Herisilia isch aber zu de Göttin Hora wore. I de Antiki isch s Grab vom Romulus underm Schwarze Stai (niger lapis) zaigt wore.