Pietro Castrucci

William Hogarth, 1741: "The Enraged Musician", villicht e Karikatur vom Castrucci.

Dr Pietro Castrucci (* 1679 z Rom; † 7. Merz 1752 z Dublin) isch en italiänische Giiger und Komponist gsi in dr Zit zwüschen em Barock und dr Vorklassik.

Lääbe

Dr Pietro Castrucci isch vermuetlig wie au si Brueder Prospero Castrucci (1690-1760) e Schüeler vom Arcangelo Corelli gsi. Dr Georg Friedrich Händel het die bäide Brüeder kennegleert, won er z Italie gsi isch. Die bäiden häi für e Kardinals Ottoboni gschafft und denn für e Lord Burlington. 1720 häi si für em Händel sis Londoner Opereorchester afo spiile. Do isch dr Pietro bis 1742 Mitgliid gsi und bis 1737 Konzärtmäister.

Dr Castrucci gältet as dr Erfinder vo dr Violetta marina. Daas Instrumänt isch e chliini Bratsche mit zuesätzlige Resonanzsaite, äänelet in sinere Zarthäit villicht dr Viola d'amore und het dr Umfang von ere gwöönlige Viola. In dr Arie "Già l'ebro mio ciglio" in dr Opere Orlando het dr Händel für bäidi Castrucci-Brüeder e Part für das Instrumänt komponiert. Die oberi Violetta marina chunnt bim Händel bis in d Hööchi vom dobbletgstrichnige Es, die underi in dr Diefi vom chliine e.

Wärk

• Op.1: Sonate für Violine und Basso continuo
• Op.2: Sonate für Violine und Basso continuo, op.1 und op.2 im Stil vo sim Lehrer Corelli.
• Op.3: 12 Concerto Grosso, die Concerti grossi si stilistisch zwüschen em Corelli sim Op.6 und dene vom Francesco Geminiani.
• 12 Sonate a Flauto traverso o Violino o Hautbois e Basso continuo, won er 1731 zämme mit em Geminiani veröffentligt het.

Fuessnoote

Dä Artikel basiert uff ere fräie Übersetzig vum Artikel „Pietro_Castrucci“ vu de dütsche Wikipedia. E Liste vu de Autore un Versione isch do z finde.